අද (09) මධ්‍යම රාත්‍රියේ සිට ක්‍රියාත්මක වන පරිදි වැඩ වර්ජනයක් ආරම්භ කිරීමට දුම්රිය රියදුරන්ගේ සංගමය තීරණය කර තිබේ.

වැටුප් ප්‍රශ්නය ඇතුළු ඉල්ලීම් කිහිපයක් මුල් කරගමිනින් මෙම වැඩ වර්ජනය ක්‍රියාත්මක කරන බවත් ඒ අනුව හෙට (10) දිනයේ දුම්රිය ධාවනය සම්පූර්ණයෙන්ම අඩාල කෙරෙනු ඇති බවත් එම සංගමයේ ලේකම් ඉන්දික දොඩංගොඩ මහතා පවසයි.

මේ අතරම අද මධ්‍යම රාත්‍රියේ සිට පැය 24ක සඛේත වැඩ වර්ජනයක් ක්‍රියාත්මක කරන බව සමස්ත ලංකා පෞද්ගලික බස් රථ සේවක සංගමය පවසයි.

රජය විසින් රථවාහන දඩ මුදල් වැඩි කිරීමට විරෝධය පළ කරමින් මෙම වැඩ වර්ජනය ක්‍රියාත්මක කරන බවයි එම සංගමයේ සංවිධායක යූ. කේ. කුමාරරත්න මහතා ප්‍රකාශ කළේ.

කෙසේවෙතත් දුම්රිය සහ පෞද්ගලික බස් රථ එකම මොහොතක වැඩ වර්ජනයේ නියැළීම නිසා එළඹෙන සිංහල – දෙමළ අලුත් අවුරුද්ද වෙනුවෙන් නිවෙස් කරා යාමට සූදානම් වන ජනතාව දැඩි අපහසුතාවකට පත් වනු ඇත.