වැටුප් විෂමතා ඉවත් කිරීම ඇතුළු ඉල්ලීම් කිහිපයක් මුල්කරගෙන සෞඛ්‍ය වෘත්තීය සමිති 16 ක් අද (08 වැනිදා) සහ දුම්රිය වෘත්තීය සමිති හෙට (09 වැනිදා) වැඩවර්ජනයේ නිරත වීමට තීරණය කර ඇත.

උසස් වීම්, වැටුප් හා දීමනා විෂමතා ඇතුළු වෘත්තීය ඉල්ලීම් 10 කට විසඳුම් ඉල්ලා හෙද පරිපූරක හා අතුරු වෛද්‍ය තනතුරුවල වෘත්තීන් 16 ක සාමාජිකයන් අද (08 දා) පෙරවරු 7.00 සිට හෙට (09 දා) පෙරවරු 7.00 දක්වා එක්දින වැඩවර්ජනයක් ක්‍රියාත්මක කර ඇත.

මේ සඳහා වෘත්තීන් 16 ට අයත් 60,000 කට අධික පිරිසක් වැඩවර්ජනයට එක්වන බව රජයේ හෙද නිලධාරීන්ගේ සංගමයේ සභාපති සමන් රත්නප්‍රිය මහතා ඊයේ (07 දා) පැවැති මාධ්‍ය හමුවකදී පැවසීය.

මේ අතර ශ්‍රේණි විෂමතාවක් මුල්කර ගෙන දුම්රිය වෘත්තීය සමිති කිහිපයක සාමාජිකයන් හෙට (09 දා) මධ්‍යම රාත්‍රි 12.00 සිට 12 වැනිදා රාත්‍රි 12.00 දක්වා පැය 48 ක වැඩ වර්ජනයක නිරත වීමට තීරණය කර ඇත.