ලබන 09 වැනිදා අධිකරණය ඉදිරියේ පෙනී සිටින්නැයි විදුලිබල මණ්ඩලයේ බලධාරීන්ට කොටුව මහේස්ත්‍රාත් අධිකරණය නොතීසි නිකුත් කර තිබෙනවා. කොටුව මහේස්ත්‍රාත් රංග දසනායක මහතා විසින් ඊයේ (02) මෙම නියෝගය නිකුත් කර තිබේ.

විදුලි කප්පාදුවට අදාල වාර්තා මහජන උපයෝගීතා කොමිසමට ලබා නොදුන් බව පවසමින් මහජන උපයෝගීතා කොමිසම අධිකරණය වෙත ගිය අතර එම කොමිසම වෙනුවෙන් කරුණු දැක්වූ නීතිඥවරු ඉල්ලා සිටියේ විදුලිබල මණ්ඩලයේ සභාපතිවරයා ඇතුළු ඉහළ නිළධාරීන් 09 දෙනෙකු අධිකරණය ඉදිරියට කැඳවන ලෙසයි.

2018 වසරේ මැයි 28 වැනිදා සිට, විදුලි කප්පාදුව ඇතුළු කාරණා කිහිපයක් සම්බන්ධයෙන් මහජන උපයෝගීතා කොමිසම විසින් ඉල්ලා සිටි වාර්තා ලබාදීම විදුලිබල මණ්ඩලය විසින් පැහැර හැර ඇති අතර නීතිඥවරුන් අධිකරණය ඉදිරියේ කරුණු දක්වමින් කියා සිටියේ ඒ පිළිබඳව අවස්ථා කිහිපයකදී කොමිසම විසින් සිහිකැඳවීම් සිදුකර ඇති බවයි.

ඒ අනුව කරුණු සලකා බැලූ මහේස්ත්‍රාත්වරයා ලබන 09 වැනිදා අධිකරණය ඉදිරියේ පෙනී සිටින්නැයි විදුලිබල මණ්ඩල සභාපතිවරයා ඇතුළු නිලධාරීන් 09 දෙනෙකුට නොතීසි නිකුත් කර තිබේ.