තම ආණ්ඩුව බලයේ සිටින විට මෙවන් විදුලි කප්පාදු කිරීම් සිදු නොවූ බවත් යුධ සමයේ දී පවා ජනතාවට විදුලිය ලබාදුන් බවත් විපක්ෂ නායක මහින්ද රාජපක්ෂ මහතා පවසයි.

විවිධ ගැටලුකාරී තත්ත්වයන් මධ්‍යෙයේ නොරොච්චෝලයේ විදුලි බලාගාරය ඉදි කිරීම සිදු නොවුණානම් පවතින තත්ත්වයට වඩා වැඩි කාලයක් ජනතාවට අඳුරේ සිටීමට සිදුවන බව ඒ මහතා ප්‍රකාශ කර සිටියේය.

ගම්පොළ පැවති උත්සවයකදී විපක්ෂ නායක මහින්ද රාජපක්ෂ මහතා මෙම අදහස් පළ කළේය.

නොරොච්චෝලේ බලාගාරයේ පිරිවැය මෙන් 10 ගුණයක් උපයා ඇති බව විගණකාධිපතිවරයාද ප්‍රකාශ කරන බව මෙහිදී ඔහු වැඩි දුරටත් ප්‍රකාශ කලේය.

වර්තමානයේදී සමස්ථ විදුලි නිශ්පාදනයෙන් 50% කට ආසන්න ප්‍රමාණයක් නොරොච්චෝලේ බලාගාරයෙන් සිදු කරනු ලබයි. මෙම විදුලි අර්බුධය සම්බන්ධයෙන් විදුලි බල ක්ෂේත්‍රයේ විශේෂඥයන් දිගින් දිගටම අනතුරු හැඟවූ අතර වත්මන් රජය විදුලි අර්බුධයට විසඳුම් සෙවීමේදී ඉතා අදූරදර්ශී ලෙස ක්‍රියා කොට ඇති බවට ඔවුන් චෝදනා කරයි. වත්මන් රජය බලයට පත්වීමෙන් පසුව කිසිදු මහ පරිමාණ විදුලි බලාගාරයක් ඉදි නොකල අතර යෝජිතව තිබූ සාම්පූර් ගල් අඟුරු බලාගාරයද අවලංගු කරන ලදි.