ශ්‍රී ලංකාවේ අභ්‍යන්තර ප්‍රශ්නවලට කෙරෙන බලපෑම් වහාම නතර කරන ලෙස ජිනීවා මානව හිමිකම් කොමිසමට බල කරමින් එම කාර්යාලය ඉදිරිපිට ඊයේ (17) පස්වරුවේ ගෝලීය ශ්‍රී ලාංකික සංසදය විසින් විරෝධතාවක් පැවැත් විය.

ස්විට්සර්ලන්තයේ ජිනිවා නුවර මානව හිමිකම් කාර්යාලය ඉදිරිපිට පැවැති මෙම විරෝධතාව සදහා අද්මිරාල් සරත් වීරසේකර මහතා ඇතුළු ඉතාලිය, ප්‍රංශය, ජර්මනිය, පෝලන්තය ස්වීඩනය, මහා බ්‍රිතාන්‍යය සහ ඩුබායි රටවල වෙසෙන ගෝලීය ශ්‍රී ලාංකික සංසදය ඇතුළු සංවිධාන කිහිපයක සාමාජිකයන් එක්ව සිටියහ.

ඔවුන් අවධාරණය කළේ, ශ්‍රී ලංකාවේ අභ්‍යන්තර ප්‍රශ්නවලට කෙරෙන බලපෑම් මානව හිමිකම් කොමසාරිස් කාර්යාලය වහාම නවතා දැමිය යුතු බවයි.

මේ අතර ප්‍රධාන සැසියට සමගාමීව අද (18) දිනයේ දෙමල ජාතික සන්ධාන මන්ත්‍රීවරුන් වන එම් ඒ සුමන්තිරන්, එස් ශ්‍රීධරන් සහ උතුරු සභා මන්ත්‍රී එම් කේ සිවාජිලිංගම්ගේ සහභාගීත්වයෙන් සමාන්තර සැසිවාරයන් කිහිපයක් පැවති අතර එම සැසිවාරයන් ආවරණය කිරීමට ගිය ශ්‍රී ලංකාවේ මාධ්‍යෙව්දීන්ට දෙමල ඩයස්පෝරාවේ පුද්ගලයින් විසින් බාධා එල්ල කර තිබේ.