ජාතික ආණ්ඩුවක් පිහිටුවීම සඳහා වන යෝජනාව පෙබරවාරි 20 වනදා පාර්ලිමේන්තුවට ඉදිරිපත් කිරීමට එක්සත් ජාතික පෙරමුණ තීරණය කර ඇතැයි වාර්තා වේ.

මෙම යෝජනාව පසුගිය 07 වනදා පාර්ලිමේන්තුවට ඉදිරිපත් කිරීමේ සූදානමක් පැවතිය ද අවසන් මොහොතේ එය කල්දමනු ලැබිණි.

19 වන ආණ්ඩුක්‍රම ව්‍යවස්ථාව යටතේ කැබිනට් අමාත්‍යධුර සංඛ්‍යාව 30කට සීමා කර ඇති අතර ජාතික ආණ්ඩුවක් පිහිටුවන්නේ නම් පමණක් එය 48ක් දක්වා වැඩිකර ගැනීමේ හැකියාව පවතී. ඒ අනුව අමාත්‍ය ධුර සංඛ්‍යාව ඉහළ නංවා ගැනීමේ අරමුණින් මෙම යෝජනාව ඉදිරිපත් කර තිබේ.

කෙසේවෙතත් විපක්ෂයේ සියලුම පක්ෂවලින් මීට විරෝධය පළව ඇති අතර එක්සත් ජාතික පෙරමුණේ ම පසුපෙළ මන්ත්‍රීවරුන් ද මීට සිය විරෝධය ප්‍රකාශ කර තිබිණි.

එහෙයින් මෙවන් දැඩි විරෝධයක් මධ්‍යයේ මෙම යෝජනාව එදිනට පාර්ලිමේන්තුවට ඉදිරිපත් කෙරුණහොත් පාර්ලිමේන්තුව තුළ නැවතත් දැඩි කලබැගෑනියක් ඇතිවනු ඇති බව දේශපාලන ආරංචිමාර්ග සඳහන් කරයි.