පසුගිය කාලපරිච්ඡේදයේ දී දකින්නට ලැබුණු දේශපාලන උච්ඡාවචනයන් හා අස්ථාවර තත්ත්වය මේ වන විට යථා තත්ත්වයට පැමිණ ඇති බව ජෝන් කීල්ස් හෝල්ඩිංග්ස් පීඑල්සී හි සභාපති ක්‍රිෂාන් බාලේන්ද්‍ර මහතා පවසයි. මෙහිදී වැඩිදුරටත් ජෝන් කීල්ස් සභාපතිවරයා අවධාරණය කර සිටින්නේ රටේ ආර්ථික හා ව්‍යාපාර වර්ධනය උදෙසා දේශපාලනික ස්ථාවරභාවය හා ප්‍රතිපත්තිවල අඛණ්ඩතාවය අත්‍යාවශ්‍ය සාධකයක් බවයි.

ජෝන් කීල්ස් හෝල්ඩිංග්ස් පීඑල්සී හි 2018 දෙසැම්බර් 31 න් අවසන් කාලපරිච්ඡේදය සඳහා වන මූල්‍ය ප්‍රකාශ නිකුත් කරමින් එහි සභාපතිවරයාගේ විමර්ශන වාර්තාවෙහි, ක්‍රිෂාන් බාලේන්ද්‍ර මහතා මේ බව සටහන් කර ඇත.

පසුගිය කාර්තුව තුළ දී ජෝන් කීල්ස් සමූහයේ සමස්ත ආදායම 17% ක වර්ධනයක් අත්පත් කර ගෙන තිබෙන අතර එය රුපියල් බිලියන 36.55 ක් ලෙසින් සටහන් වේ. මේ සමඟ 2018/19 මූල්‍ය වර්ෂයේ පළමු මාස 09 තුළ දී සමූහය උපයා ඇති ආදායම රුපියල් බිලියන 99.28 ක් ලෙසින් වාර්තා වී ඇති අතර එය පූර්ව මූල්‍ය වර්ෂයේ අදාළ කාලපරිච්ඡේදයට වඩා 13% ක වර්ධනයකි.

මේ අතර ජෝන් කීල්ස් සමූහයේ බදු පෙර ලාභය, 2018 දෙසැම්බර් 31 න් අවසන් කාර්තුවේ දී සටහන් වන්නේ රුපියල් බිලියන 5.63 ක් වශයෙනි. කෙසේ වෙතත් මෙය 2017 දෙසැම්බර් 31 න් අවසන් කාර්තුවේ වාර්තා වූ බදු පෙර ලාභයට වඩා 3% ක පහළ යාමකි. එසේම 2018/19 මූල්‍ය වර්ෂයේ මුල් මාස 09 හි බදු ගෙවීමට පෙර ලාභය පෙර වර්ෂයට වඩා 11% ක අඩුවීමක් වාර්තා කෙරෙන අතර එය රුපියල් බිලියන 13.23 ක් ලෙසින් වාර්තා වී තිබේ.