ලෝක වෙළෙඳ පොළෙහි බොරතෙල් මිල මේ වසර ආරම්භයත් සමග යළිත් වරක් ඉහළ ගොස් ඇතැයි වාර්තා වෙයි.

ඒ අනුව අද (07දා) වන විට ලෝක වෙළෙඳ පොළේ බ්‍රෙන්ට් බොරතෙල් බැරලයක මිල ඩොලර් 58.11ක් බවට පත්ව තිබිණි. එහෙත් පසුගිය දෙසැම්බර් 25 වැනිදා වන විට මෙම බ්‍රෙන්ට් බොරතෙල් බැරලයක මිල ඩොලර් 50.77ක් දක්වා පහත වැටී තිබිණි.

කෙසේ වෙතත් දෙසැම්බර් 26 වැනිදා වන විට බ්‍රෙන්ට් බොරතෙල් බැරලයක මිල ඩොලර් 54.76ක් බවට පත්විය. අනතුරුව එය දෙසැම්බර් 27 වැනිදා ඩොලර් 52.73ක් දක්වා අඩු වූ අතර, පසුව එය ක්‍රමයෙන් මෙලෙස ඉහළ යෑමක් වාර්තා වී තිබේ.

විශේෂයෙන්ම ලෝක වෙළෙඳ පොළට බොරතෙල් සපයන ප්‍රධාන පෙළේ රාජ්‍යයන් සිය නිෂ්පාදන අඩු කිරීම මීට හේතුව වී ඇතැයි වෙළෙඳ පොළ ආරංචිමාර්ග පවසයි. එසේම ඔපෙක් සාමාජික රටවල් මෙන්ම රුසියාවද ජනවාරියේ පටන් සිය දෛනික තෙල් බැරල් නිෂ්පාදනය බැරල් ලක්ෂ 12කින් අඩු කිරීමට තීරණය කර තිබේ. ඒ අනුව මෙම මිල ඉහළ යෑම ප්‍රවණතාවක් බවට පත්වීමේ අවස්ථාවක්ද පවතී.