සිම්බාබ්වේ රාජ්‍යයේ බලය අල්ලාගත් එරට හමුදාව 93 හැවිරිදි ජනපති රොබට්‌ මුගාබේ අත්අඩංගුවට ගෙන ඇත. මුගාබේ සමඟ ඔහුගේ පවුලේ උදවියද හමුදා අත්අඩංගුවට පත්ව සිටිති. රොබට්‌ මුගාබේගෙන් පසුව එරට ජනපති පුටුවට ඔහුගේ 52 හැවිරිදි බිරිය පත්කිරීමට සූදානම්වීම පිළිබඳව එරට හමුදාවේ දැඩි විරෝධය පළවිය. ඒ අනුව මේ ලේ නොහැළුණු හමුදා කුමන්ත්‍රණය දියත් විය. සිම්බාබ්වේ අගනුවර පුරාම යුද ටැංකි නවතා ඇති අතර හමුදා භටයෝ නගරය පුරා මුර සංචාරවල නිරත වෙති.

හිටපු උප ජනාධිපති එමර්සන් හන්ගාවා මුගාබේ විසින් ධුරයෙන් පහකිරීම ගැනත් හමුදාවේ දැඩි විරෝධය පළවිය. හමුදා කුමන්ත්‍රණයත් සමඟ හිටපු උප ජනාධිපතිවරයා නැවත සිය රට බලා පැමිණ ඇත. 1980 සිට ජනපති පදවිය හෙබවූ මුගාබේ ලොව වයස්‌ගතම රාජ්‍ය නායකයා විය. ඔහු 1924 දී උපත ලබා ඇත. හමුදාව බලය අල්ලා ගැනීමෙන් පසු හරාරේ නගරයේ පිපිරීම් කිහිපයක්‌ සිදුවූ බව ජාත්‍යන්තර මාධ්‍ය කියයි.