පළාත් පාලන මැතිවරණය පිළිබඳ සාකච්ඡා කිරීමට ශ්‍රී ලංකා නිදහස් පක්ෂ නායක හා ජනාධිපති මෛත්‍රීපාල සිරිසේන මහතා කැඳවා ඇති සාකච්ඡාවට සහභාගි නොවීමට ඒකාබද්ධ විපක්ෂය තීරණය කර ඇතැයි වාර්තා වේ.
පළාත් පාලන මැතිවරණයේදී ඒකාබද්ධ විපක්ෂය සමග එක්ව තරග නොකළහොත් අන්ත පරාජයක් අත්විය හැකි බව ශ්‍රී ලංකා නිදහස් පක්ෂ ජ්‍යෙෂ්ඨයන්ගේ මතයයි. ඔවුන්ගේ බලපෑම මත ඒ පිළිබඳ ඒකාබද්ධ විපක්ෂය සමග සාකච්ඡා කිරීමට පක්ෂ නායකයා ලෙස ජනාධිපතිවරයා විසින් මේ මස 03 දා සාකච්ඡාවක් කැඳවා තිබේ.
එහෙත් ඒකාබද්ධ විපක්ෂයේ බහුතරයකගේ මතය වී ඇත්තේ 2015 අගෝස්තු මස මැතිවරණයේදී මෙන් රැවටීමකට ලක්නොවිය යුතු බවයි. මේ හේතුවෙන් එක්ව තරග නොකළ යුතු බවත් එනිසා තුන් වැනිදා සාකච්ඡාවලට යෑම ඵල රහිත බවත් ඔවුන් පෙන්වා දෙයි.
මේ සම්බන්ධයෙන් අවසන් තීරණය ගැනීමට හිටපු ජනාධිපති මහින්ද රාජපක්ෂ මහතාගේ ප්‍රධානත්වයෙන් අද සවස ඒකාබද්ධ විපක්ෂයේ සාකච්ඡාවක් පැවැත්වීමට නියමිතය.
ඒකාබද්ධ විපක්ෂ ප්‍රකාශකයකු පැවසුවේ මෙම සාකච්ඡාවේදී ද අවසන් තීරණය වනු ඇත්තේ වෙන්ව තරග කිරීම පමණක් බවය.