ආසියානු නෙට්බෝල් ශූරතාව දිනා ගත් චතුරංගි ජයසූරිය ප‍්‍රමුඛ ශ‍්‍රී ලංකා නෙට්බෝල් කණ්ඩායම අද (11) අලූයම මව්බිමට පැමිණියා. ලැබූ මෙම ජයග‍්‍රහණය පිළිබඳ නෙට්බෝල් කණ්ඩායමේ නායිකා චතුරංගි ජයසූරිය නෙත් ස්පෝර්ට්ස්මන් වෙත එහිදී අදහස් පළ කළා.

එහිදී “අපි හැම වෙලාවෙම කණ්ඩායමට අවංක වුණා. පුහුණුකාරිනීය කියපු විහිදට තමයි කටයුතු කළේ. මූලිකම දේ අපේ පුහුණුකාරිණිය අපි සම්පූර්ණයෙන්ම විශ්වාස කළා. ඒ නිසා අපිට ජයග්‍රහණය පිළිබඳ අරමුණක් තිබුණා.” යැයි සඳහන් කළා.

ශ‍්‍රී ලංකා කණ්ඩායමේ ගෝල විදින්නියක වූ තර්ජනී සිවලිංගම් මෙවර තරගාවලියේදී වැඩි දෙනෙකුගේ අවධානය දිනාගත් ක‍්‍රීඩිකාවක්. ඇයද නෙත් ස්පෝර්ට්ස්මන් වෙත අදහස පළ කළා.

“මම වසර 03කට පස්සේ තමයි ශ්‍රී ලංකා කණ්ඩායමට ආයෙත් සම්බන්ධ වුණේ. හැබැයි මම පුහුණුවීම් අත්නොහැරපු නිසා මගේ කණ්ඩායම..මගේ පුහුණුකාරිණිය මා ගැන තියපු බලාපොරොත්තු ඉටු කරන්න හැකි වුණා.”

වසර කිහිපයකට පසු ආසියානු ශූරියන් වෙමින් ශ‍්‍රී ලංකා නෙට්බෝල් කණ්ඩායම ලැබූ මෙම ජයග‍්‍රහණය සම්බන්ධයෙන් එහි පුහුණුකාරිණිය වන තිලකා ජිනදාසද අදහස් දැක්වූයේ ඉතා සතුටින්.

“2009 වසරේ මම ආසියානු තරගාවලිය ජයග්‍රහණය කරලා ලෝක තරගාවලියට අපි සුදුසුකම් සපුරණවා. ඊට පස්සේ මට නැවත පුහුණු කරන්න හම්බවෙන්නේ නෑ…අවුරුදු 09ක් වෙනකම්. මම හිතනවා ඒක නැවත සිදු වෙන එකක් නැතුව ඊළඟ ලෝක තරගාවලියෙත් මට ශ්‍රී ලංකා කණ්ඩායමේ පුහුණුකාරිණිය විදිහට හරියට කටයුතු කරගෙන යන්න ඉඩ ලැබේවා කියලා.”

ක‍්‍රීඩිකාවන් පිළිබඳ දැනට වඩා වැඩි අවධානයක් යොමු කළ යුතු බවද ඔවුන්ගේ පහසුකම් වැඩි කළ යුතු බවද මෙහිදී ප‍්‍රකාශ කෙරුණා. මේ අතර අද අලූයම මව්බිමට පැමිණි ශ‍්‍රී ලංකා නෙට්බෝල් කණ්ඩායම පිළිගැනීම සඳහා ක‍්‍රීඩා අමාත්‍ය ෆයිසර් මුස්තාපාද කටුනායක ගුවන් තොටුපොළ වෙත පැමිණ සිටියා.