ආර්ථික වශයෙන් ලාභදායි මෙන්ම රටේ උපාය මාර්ගික වශයෙන් වැදගත් ආයතනයක් වන මත්තල ගුවන්තොටුපළ ගුවන් සේවා පනත වෙනස් කර හෝ විකිණිය යුතු බව පවසන ගුවන්සේවා ඇමති නිමල් සිරිපාලද සිල්වා මහතාගේ ප්‍රකාශය දැඩි පිළිකුලෙන් යුතුව හෙළා දකින බව ජාතික සංවිධාන එකමුතුව පවසයි.

අද (25) ජාතික සංවිධාන පොදු මධ්‍යස්ථානයේ පැවති මාධ්‍ය හමුවකට එක්වෙමින් වෛද්‍ය වසන්ත බණ්ඩාර මහතා මේ බව කියා සිටියේය.

වැඩිදුරටත් අදහස් දැක්වූ වසන්ත බණ්ඩාර මහතා ‘‘වරාය ඉදිකිරීමත් සමඟ මත්තල ගුවන්තොටේ අවශ්‍යතාව දෙගුණ තෙගුණ වුණා. දකුණු චීන මුහුදේ සිට අරාබි මුහුද දක්වා දිවෙන මුහුදේ පිහිටි ලෝකේ ලොකුම වරායවලින් එකක් වන්නේ හම්බන්තොට වරායයි. ඇත්තටම ලෝකයේ විශාලතම වරායවල් අතුරින් 10 වන ස්ථානය හිමි වරාය ද හම්බන්තොට වරායයි. ඒ තරම්ම වැදගත් වරායකට සේවා සැපයීමට ජාත්‍යන්තර මට්ටමේ විශාල ගුවන් පථයක් හිමි ගුවන්තොටුපළක් අවශ්‍යයි. ඒ නිසා හම්බන්තොට වරාය හා මත්තල ගුවන්තොටුපළ අපට හිමි ඉතාමත් වැදගත් ආර්ථික මර්මස්ථාන දෙකක්. ‘‘ යයිද පවසා සිටියේය.

එමෙන්ම මේ තරම් වටිනාකමක් ඇති ආයතන දෙකක් වන හම්බන්තොට වරාය සහ මත්තල ගුවන්තොටුපල කළමණාකරනය කර ගැනීමට නොහැකි අමාත්‍යවරයෙක් මෙන්ම ආණ්ඩුවක් රටකට අව්‍ය නොවන බවද ඔහු වැඩිදුරටත් අවධාරණයකර සිටියේය.