පාකිස්තානයේ කිබර් පක්ටුන්ක්වා පළාතේ බජෝර් දිස්ත්‍රික්කයේ ඊයේ(30) පැවති ජමියාත් උලෙමා ඉස්ලාම් ෆාසල් දේශපාලන පක්ෂයේ සමුළුවක් අතරතුර සිදු වූ පිපිරීමකින් 44 දෙනෙකු මියගොස් තවත් 200 දෙනෙකු තුවාල ලබා ඇතැයි පාකිස්තාන මාධ්‍ය වාර්තා කර ඇත.

එම පක්ෂයේ සාමාජිකයන් 400 දෙනකු පමණ පිපිරීම සිදු වූ අවස්ථාවේ සමුළුවට සහභාගී වෙමින් සිට ඇති බව පාකිස්තාන පොලිසිය ප්‍රකාශ කර ඇති අතර, පිපිරීම හේතුවෙන් බරපතල තුවාල ලැබූවන් ගුවන් මගීන් කිබර් පක්ටුන්ක්වා පළාතේ අග නගරය වූ පේෂාවර් හි රෝහල් වෙත රැගෙන ගිය බව පාකිස්තාන බලධාරීන් පවසා තිබේ.

පිපිරිම හේතුවෙන් ජමියාත් උලෙමා ඉස්ලාම් ෆාසල් පක්ෂයේ ප්‍රාදේශීය නායකයකු වූ මවුලානා සියවුල්ලා ද මිය ගිය බව එම පක්ෂය නිවේදනයක් නිකුත් කරමින් ප්‍රකාශ කර ඇත.

පාකිස්තාන බලධාරීන් පවසා ඇත්තේ මියගිය සංඛ්‍යාව සහ තුවාල ලැබූ සංඛ්‍යාව තවත් ඉහළ යා හැකි බවයි.