පාර්ලිමේන්තුවට ඉදිරිපත් කර ඇති 1961 අංක 31 දරන ආයුර්වේද පනත සංශෝධනය කිරීම සඳහා වූ පනත් කෙටුම්පතේ වගන්ති කිහිපයකින් වසර දහස් ගාණක් තිස්සේ පැවැත එන හෙළ වෙදකම කනත්තට යවා දේශීය වෛද්‍යවරයා හිරගෙට යැවීමේ කුමන්ත්‍රණයක් සූක්ෂමව ක්‍රියාත්මක වන බව පවසමින් දේශීය වෛද්‍යවරුන්ගේ එකමුතුව මඟින් ඉකුත්දා රත්නපුර ඔරලෝසු කණුව ඉදිරිපිටදී උද්ඝෝෂණයක් සංවිධානය කර තිබිණි.

මෙහිදී අදහස් දැක්වූ දේශීය පාරම්පරික වෛද්‍යවරුන්ගේ එකමුතුවේ සභාපති වෛද්‍ය චින්තක ජයලත්ආරච්චි,

“2023 ජුනි 09 වැනි දින පාර්ලිමේන්තුවට ඉදිරිපත් කර ඇති ආයුර්වේද පනත සංශෝධනය කිරීම සඳහා වූ පනත් කෙටුම්පතේ වගන්ති කිහිපයකින් හෙළ වෛද්‍යවරුන්ට ඉදිරියේදී විශාල ප්‍රශ්න රැසකට මුහුණපෑමේ අවදානමක් මතුව තිබෙනවා. ඒ හරහා හෙළ වෙදකම කාටත් හොරා ඉතා සූක්ෂමව කනත්තට යැවීමටත් දේශීය වෛද්‍යවරයා සිරගෙට යැවීමට අවශ්‍ය ප්‍රතිපාදන මේ තුළින් සලසා තිබෙනවා.

මෙම පනත් කෙටුම්පතට අපි සම්පූර්ණයෙන්ම විරුද්ධ නෑ. සංශෝධනය කිරීම හරහා ගැටලු මතුව තිබෙනවා. එම අහිතකර වගන්ති ඉවත් කිරීමට කටයුතු කරන ලෙස අපි රජයෙන් ඉල්ලනවා. එහෙම නොවුණොත් රට වටේ ඉන්න දහස් ගණනක් වූ හෙළ වෛද්‍යවරු කොළඹට එන්න කටයුතු කරනවා.”