වසර හයක කාලයක් පුරා පදිංචිව සිටි ඉඩම්වලින් ඉවත් කළ 370ක් වන පවුල් යළි පදිංචි කරන ලෙස බලකරමින් මඩකලපුව දිවුල්පතාන ගම්වාසීහු පිරිසක් ඉකුත් දා එම ගම්මානයේ දී විරෝධතාවක නිරතිවී තිබේ.

දිවුල්පතාන ගම්මානයේ මේ වන විට ඉතිරිවූ පවුල් 30කට ශ්‍රී ලංකා මහවැලි අධිකාරියෙන් නඩු පවරන බවට තර්ජනය කරමින් තමන්ව ඉවත් කිරීමට කටයුතු කරන බවත්, තම ගම්මානයේ පවුල් 300ක් පමණ ස්ථිර නිවාස හදාගෙන සිටිය දී එම නිවාස කඩා බිඳදමමින් බලහත්කාරයෙන් පන්නා දැමූ බවත් තමන් පදිංචි කාලය වන 2009 වසරේ සිට 2015 දක්වා තමන් කවුපි, ඉරිඟු, කැකිරි, මුං වගාකරමින් විශාල අස්වැන්නක් ලබාගෙන තමන්ට මෙන්ම රජයට ද විශාල ආර්ථික වාසියක් ලබාදුන් බවත් ඔවුහු පවසති.

මෙම අවස්ථාවට වැඩම කළ දිඹුලාගල අරුණපුර ශ්‍රී මහින්දාරාමයේ කෘත්‍යාධිකාරී පොල්ගහආරාවේ ඤාණානන්ද හිමියන් මෙහිදී සඳහන් කළේ අසාධාරණයට ලක්වූ මඩකලපුව, අම්පාර, පොළොන්නරුව සිංහල ජනතාවගේ ඉඩම් අයිතිය ලබාදෙන තෙක් මෙම සටන් ව්‍යාපාරය ක්‍රියාත්මක කරන බවය.

මේ වන විට නැගෙනහිර පළාතේ දේශපාලන අධිකාරිය හා සංවිධාන එක්ව සිංහල ජනතාවට උරුමව තිබූ මෙම ඉඩම් බලහත්කාරයෙන් අත්පත්කර ගැනීමේ ව්‍යාපාරයක් ක්‍රියාත්මක කරන බවද විරෝධතාකරුවෝ චෝදනා කරති.