ශ්‍රී ලංකාවට නිවැරදිවීම සඳහා ලැබී ඇත්තේ අවසන් අවස්ථාව බවත් නිවැරදි නොවුවහොත් ලෝක සිතියමේ රටක් ලෙස පැවැත්ම අවසන් වන බවත් මහ බැංකු අධිපති නන්දලාල් වීරසිංහ මහතා විසින් සිදුකර ඇති ප්‍රකාශය සම්බන්දයෙන් අප ජාතික සංවිධානවල මතය විමසන ලදී.

මේ එහි මාධ්‍ය ප්‍රකාශක වසන්ත බණ්ඩාර මහතාගේ අදහස ඔහුගේ වචනයෙන්….

“අද පවතින අර්බුදයට ප්‍රධාන මූල හේතුවක් වන පසුගිය රනිල් වික්‍රමසිංහ ආණ්ඩුව විසින් ඉතා අධික පොලියට අන්තර්ජාතික ස්වෛරි බැදුම්කර ඇමෙරිකන් ඩොලර් මිලියන 12500ක් නිකුත්කරන විට වත්මන් මහ බැංකු අධිපති නන්දලාල් වීරසිංහ මහතා ජ්‍යෙෂ්ඨ නියෝජ්‍ය අධිපතිවරයා. එතුමා කැල්කියුලේටරෙන් ගහලා බැලුවත් දන්නවා රටේ පවතින වෙළඳ හිගය සහ ගෙවුම්ශේෂ හිඟය අනුව එම ණය ගෙවාගන්න බැරිව මූල්‍ය අර්බුදයක් ඇතිවන බව. නමුත් ඒම වරද නොකරන ලෙසට ඔහු උපදෙස් ලබාදී නැහැ. එම මුදල් කිසිදු සංවර්ධන ව්‍යාපෘතියකට වැයකර නැහැ. අදත් එදා 2017 දී සම්මත කළ විේශ විනිමය පනත් වෙනස් කරන්නේ නැතිව විදේශ විනිමය අර්බුදය විසදන්න බැරිබව ඔහු කියන්නේ නැහැ. අර්බුදය නිර්මාණය කළ වෙදා ලෙඩා බාරගෙන දැන් කියනවා ආශ්චර්යක් වුණේ නැතිනම් ලෙඩා මැරෙන බව.”