ගාලු මුව‍ෙදාර අරගලයට නායකත්වය ලබාදුන් පුද්ගලයන් රැසකගේ බැංකු ගිණුම්වලට විදේශයන්ගෙන් මුදල් ලැබී තිබේ දැයි මේ වන විට ආරක්ෂක අංශ විමර්ශනය කරමින් සිටින බව ශ්‍රී ලංකා පොදුජන පෙරමුණේ පාර්ලිමේන්තු මන්ත්‍රී මහින්දානන්ද අලුත්ගමගේ පවසයි.

එම ගිණුම්වලට මුදල් ලැබී තිබෙන ආකාරය පිළිබඳව දැනට තොරතුරු ලැබී තිබෙන බව ත් ඒ අනුව අරගලයට නායකත්වය දුන් අයට ඩොලර් ලැබුණු ආකාරය පිළිබඳව ඉදිරියේදී ඉතා වැදගත් හෙළිදරව්වක් සිදුවනු ඇති බව ත් මන්ත්‍රීවරයා සඳහන් කරයි.

අරගලයට සම්බන්ධ වූ රාජාංගණයේ සද්ධාරතන හිමියන්ගේ ගිණුම්වලට ගෝතමාලාවෙන් රුපියල් කෝටි 4ක් සහිතව රුපියල් කෝටි 10ක් මුදල් ලැබී ඇතැයි මේ වන විට අපරාධ පරීක්ෂණ දෙපාර්තමේන්තුව සොයාගෙන ඇතැයි පැවසූ මන්ත්‍රීවරයා ගල්වල සිරිධම්ම හිමියන්ගේ ගිණුම්වලට මුදල් ලැබී ඇති ආකාරය පිළිබඳව විමර්ශනය කරමින් සිටින බව ද සඳහන් කරයි.

එමෙන්ම ජනාධිපති රනිල් වික්‍රමසිංහගේ නිවෙස ගිනි තැබීමට සම්බන්ධ බවට අත්අඩංගුවටගෙන ඇති තරුණයෙකුගේ බැංකු ගිණුම්වලට විදේශයන්ගෙන් ඩොලර් ලැබී ඇතැයි ද ඔහු පවසයි.

දෙමළ ඩයස්පෝරාව ඇතුළු විදේශීය රටවල් හා තානාපති කාර්යාල මෙම අරගලකරුවන්ට මුදල් ලබා දී තිබෙන බවට ද තොරතුරු ලැබී ඇති බවයි පාර්ලිමේන්තු මන්ත්‍රීවරයා පවසන්නේ.