ඩෙංගු වසංගතය ගැන දෙමාපියන් විශේෂයෙන් අවධානය යොමු කිරීම ඉතා වැදගත් බවත්, දරුවන් පාසල් එවීමේ දී දරුවන්ගේ ශරීරයේ නිරාවරණය වන කොටස්වල සුදුසු මදුරු විකර්ශකයක් ගල්වා එවීමට දෙමාපියන් වගබලාගත යුතු බවත්, ජාතික ඩෙංගු මර්දන ඒකකයේ වෛද්‍ය ළහිරු කොඩිතුවක්කු මහතා පවසයි.

පවතින වැසි තත්ත්වයත් සමග ඩෙංගු රෝගීන්ගේ සීග්‍ර වර්ධනයක් දකින බවත් සෞඛ්‍ය නිලධාරී කොට්ඨාස 67 ක් ඩෙංගු අවදානම් කලාප ලෙස නම්කර ඇති බවත් හෙතෙම පවසයි.

මෙම වසරේ ද මේ දක්වා (ජුනි 11 දක්වා) කාලය තුළ දිවයිනෙන්ම ඩෙංගු රෝගීන් 42,961 ක් වාර්තා වන බවත්, එම කාලය තුළ ඩෙංගු මරණ 25 ක් වාර්තා වන බවත් පැවසූ ඒ මහතා වැඩිම ඩෙංගු රෝගීන් සංඛ්‍යාවක් වාර්තා වන්නේ බස්නාහිර පළාතෙන් වන අතර එම සංඛ්‍යාව 21,435 ක් බවත් සඳහන් කරයි.

පසුගිය වසරේ (2022) දිවයිනෙන්ම ඩෙංගු රෝගීන් 76, 689 ක් වාර්තා වූ අතර එම වසරේ ඩෙංගු මරණ 72 ක් සිදුව ඇත.

මේ අතර සමස්ථ ඩෙංගු රෝගීන්ගෙන් සියයට 25 ක්ම පාසල් දරුවන් බවයි සෞඛ්‍ය අමාත්‍යාංශය පවසන්නේ.