2023 වසරේ මේ දක්වා (ජනවාරි 01 වැනිදා සිට මැයි 19 වැනිදා දක්වා) කාලයේ දී මෙරටින් වාර්තාවන සමස්ත ඩෙංගු රෝගීන් සංඛ්‍යාව තිස්පන්දහස් හැත්තෑ පහක් (35,075) දක්වා ඉහළ ගොස් ඇති බව ජාතික ඩෙංගු මර්දන ඒකකයේ අධ්‍යක්‍ෂ විශේෂඥ වෛද්‍ය නලින් ආරියරත්න මහතා පවසයි.

මෙම කාලය තුළ ඩෙංගු මරණ 22 ක් වාර්තාවන බවත්, ඉන් මරණ පහක්ම වාර්තා වී ඇත්තේ බස්නාහිර පළාතෙන් බවත් ඔහු පවසයි.

ඒ අනුව කොළඹ දිස්ත්‍රික්කයෙන් ඩෙංගු රෝගීන් 7348 දෙනෙකු ද ගම්පහ දිස්ත්‍රික්කයෙන් 7904 දෙනෙකු ද වාර්තා වන බව ද හෙතෙම සඳහන් කරයි.

මේ වනවිට දිනකට ඩෙංගු රෝගීන් 400 දෙනෙකු පමණ වාර්තාවන බව ද ඒ මහතා වැඩිදුරටත් පවසයි.

මෙම තත්ත්වය තුළ දිවයිනේ සෑම රැකියා ආයතනයක්ම සිකුරාදා දිනයේ පැය 2 ක් පිරිසිදු කර ගැනීමට කාලය වෙන්කරවා ගන්නැයි ඒ මහතා සියලු ආයතන ප්‍රධානීන්ගෙන් ඉල්ලීමක් ද කරයි.