වවුනියාව දිස්ත්‍රික්කයේ වඩ්ඩුනාගල පබ්බත විහාරයේ පුරාවිද්‍යා භූමිය සුරක්ෂිත කිරීමට සහ ආරක්ෂා කිරීමට කඩිනම් පියවර ගන්නා ලෙස බලධාරීන්ට නියෝග කරන ලෙස ඉල්ලා ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබේ.

පෙත්සම්කාර පූජ්‍ය ගල්ගමුවේ ශාන්තබෝධි හිමි, බ්‍රිගේඩියර් (විශ්‍රාමික) අතුල ද සිල්වා, මාධ්‍යවේදිනී ෂෙනාලි ඩී වඩුගේ, ව්‍යාපාරික ජිහාන් හමීඩ්, නිල්හාන් පෝල් ප්‍රනාන්දු සහ උපාලි ජයසිංහ බණ්ඩාර යන මහත්ම මහත්මීන් විසින් මෙම පෙත්සම නීතිඥ දර්ශන වේරදූවගේ මහතා මාර්ගයෙන් ගොනු කර තිබේ.

වඩ්ඩමාන පර්වත (පබ්බත) විහාරය වවුනියාව දිස්ත්‍රික්කයේ නයනයමඩු වනාන්තරයේ වෙඩිකින්නරිමලෙයි පුරාවිද්‍යා භූමිය තුළ පිහිටා ඇත. පෙත්සම්කරුවන් කියා සිටියේ බෞද්ධ ආරාම සංකීර්ණයක් වන වඩ්ඩමාන පබ්බත විහාරය අනුරාධපුර යුගයේ මුල් භාගය දක්වා දිවෙන බවයි. සෙල්ලිපිවලට අනුව මෙම ලෙන් මහා සංඝරත්නයට (සාංගික) පූජා කර ඇත.

මෙම පෞරාණික බෞද්ධ ආරාමයට දීර්ඝ ඉතිහාසයක් ඇති බව පෙත්සම්කරුවන් සඳහන් කළේය. 2010 දී මෙම ස්ථානය පුරාවිද්‍යා දෙපාර්තමේන්තුව විසින් නැවත සොයා ගෙන නැවත හඳුනා ගත් අතර එය පුරාවිද්‍යාත්මකව ආරක්‍ෂිත ස්මාරකයක් ලෙස ගැසට් කිරීමට යෝජනා විය. 2018 වසරේදී බ්‍රාහ්මී සෙල්ලිපි සහිත එක් ලෙනක බිම පිටතින් ගෙනැවිත් පස්වලින් පුරවා සමතලා කළ මෙම ස්ථානයේ විනාශකාරී ක්‍රියා සිදු වූ බව පෙත්සම්කරුවෝ චෝදනා කළහ. ගඩොල් ස්තූපයේ ගඩොල් ඉවත් කර ඇති අතර, දෙවියන්ගේ රූපයක් ඇතුල් කර ඇත.

පොලිස්පති චන්දන වික්‍රමරත්න, මහජන ආරක්‍ෂක අමාත්‍ය ටිරාන් අලස්, ජ්‍යෙෂ්ඨ නියෝජ්‍ය පොලිස්පති විජිත ගුණරත්න, නියෝජ්‍ය පොලිස්පති අම්පාවිල, ජ්‍යෙෂ්ඨ පොලිස් අධිකාරී චාමික වික්‍රමසිංහ ඇතුළු වගඋත්තරකරුවන්ගේ ක්‍රියා හෝ අක්‍රියභාවය හිතාමතා නොසැලකිලිමත්ව සහ අසාධාරණ ලෙස ක්‍රියා කරන බව පෙත්සම්කරුවෝ වැඩිදුරටත් කියා සිටියහ. ශ්‍රී ලංකා ආණ්ඩුක්‍රම ව්‍යවස්ථාවේ 10, 12.1 සහ 14 (1) (ඉ) වගන්තිය යටතේ නිසි පරිදි සහතික කර ඇති බෞද්ධ පුරවැසියන්ගේ මූලික අයිතිවාසිකම් උල්ලංඝනය කර ඇති බවද ඔවුහු සිය පෙත්සම මගින් පවසති.