ශ්‍රී ලංකාවේ කෘෂිකාර්මික කටයුතු සඳහා අවශ්‍ය යූරියා හා MOP පොහොර ලබා ගැනීම පහසු කර ගැනීමට රුසියානු රජයේ සහයෝගය ලබා දීමට එකඟත්වය පළ කර තිබේ.

ශ්‍රී ලංකාව හා රුසියාව අතර පවතින ද්විපාර්ශ්වික සහයෝගිතාව මත හා දෙරට අතර පවතින මිත්‍රත්වය තහවුරු කරමින් මෙම යූරියා හා MOP පොහොර ලබා දීමේ වැඩ පිළිවෙළ ක්‍රියාත්මක කිරීමට එකඟත්වය පළ කර ඇති බව කෘෂිකර්ම අමාත්‍යංශය පවසයි.

මේ සම්බන්ධව සාකච්ඡාවක් ඊයේ (මැයි 3) පෙරවරුවේ කෘෂිකර්ම අමාත්‍යංශයේදී පැවැත්වූ අතර ඊට ශ්‍රී ලංකාවේ රුසියානු තානාපති එච්.ඊ. ලෙවන් ධගරායන් (H.E. Levan Dzhagarayan) මහතා හා කෘෂිකර්ම අමාත්‍ය මහින්ද අමරවීර මහතා සහභාගි වී ඇත.

ශ්‍රී ලංකාවේ කෘෂිකාර්මික කටයුතු සඳහා අවශ්‍ය යුරියා හා MOP පොහොර සැපයීමේ වැඩ පිළිවෙළ කඩිනමින් ආරම්භ කිරීම සඳහා දෙරට අතර කටයුතු කඩිනමින් ආරම්භ කරන බව ද මෙහිදී රුසියානු තානාපතිවරයා සඳහන් කර තිබේ.