ඊ.ටී.අයි. ආයෝජකයින්ගේ මුදල් චිත්‍රපට නිෂ්පාදනයට යොදාගෙන ඇති බව එක්සත් ජනතා නිදහස් සන්ධානයේ පාර්ලිමේන්තු මන්ත්‍රී සිසිර ජයකොඩි මහතා පවසයි.

ඒකාබද්ධ විපක්ෂයේ ආර්ථික පර්යේෂණ ඒකකය ඊයේ (08) පැවැත්වූ ප්‍රවෘත්ති සාකච්ඡාවකදී ඔහු මේ අදහස් පළ කළේය.

එහිදී ඒ මහතා මෙසේ අදහස් දැක්විය.

“දැන් මේ ETI ආයතනය මෙහෙය වන්නේ EAP සමූහ ව්‍යාපාරය විසින්. මේ තැන්පත්කරුවන්ගේ මුදල් වලට සිද්ධ වුණේ කුමක්ද? වැඩි කොටසක් වැය කරලා තියෙන්නේ චිත්‍රපටි නිෂ්පාදනය කරන්න. දැන් එහෙම නම් ETI තැන්පතුකරුවන්ගේ අරමුදල් වැඩිපුර වැය කරලා තියෙන්නේ රන්ජන් රාමනායකගේ ප්‍රතිරූපය හදන්න. අසාධාරණයට, අයුක්තියට, තිරයේදී වීරයා වගේ කටයුතු කරන බව නිරූපණය කරන්න ETI අහිංසක තැන්පත්කරුවන්ගේ මුදල් වැය කරලා තියෙනවා.

ඒ නිසා ETI තැන්පත්කරුවන්ගේ ඔය මුදල් ලබා ගන්න පුළුවන් ප්‍රධාන තැනැත්තා රන්ජන් රාමනායක මහත්තයා. අනුන්ට චෝදනා කර කර ඉන්න රන්ජන් රාමනායක මහත්තයා ගාවට ගිහිල්ලා ඒවායේ පොලියත් එක්ක ලබා ගන්න කියන ඉල්ලීම අපි කරනවා.”