නෙළුම් කුළුණට ගත් ණය ගෙවන්නට නම් දිනකට එම කුළුනෙන් ඩොලර් 41000 ක් හෙවත් රුපියල් එක්කෝටි පනස් ලක්ෂයක් ඉපැයිය යුතු බව කොළඹ දිස්ත්‍රික් මන්ත්‍රී පාඨලී චම්පික රණවක මහතා පවසයි.

“තව්තිසාවේ” ඇත්ත තත්ත්වය මෙය බවත්, නෙළුම් කුළුණෙන් දිනකට රුපියල් මිලියන තුනක් සෙව්වා යැයි සතුටු විය නොහැකි බවත් සඳහන් කරන ඔහු, නෙළුම් කුලුන ඉදිකිරීමට ඩොලර් මිලියන 104ක් වැය වී තිබෙන බව ද සඳහන් කරයි.

ඉඩමේ සිටි දුගී පැල්පත්වාසීන්ට ගෙවල් දෙන්න එක පවුලට මිලියන 4.5 ගානේ වැය වූ බවත්, කුළුණේ පොළිය, රක්ෂණ ගාස්තු සහ අනෙක් වියදම් එකතු කළ විට තවත් ඩොලර් මිලියන 56ක් ඊළඟ අවුරුදු පහේ දී ගෙවිය යුතුත් බවත් ඔහු පවසයි.

පිටතින් ලස්සනට පෙනෙන මෙවැනි ව්‍යාපෘතිවල පසුපස මහා කරුම කතාවක් සැඟවී තිබේ යැයි පවසන මන්ත්‍රීවරයා ශ්‍රී ලංකාවට උරුම වී ඇති බංකොලොත්භාවය ද එම කරුම කතාවේ සැඟවී ඇතැයි සඳහන් කරයි.