ලංකා ඛනිජ තෙල් නීතිගත සංස්ථාව පවසන්නේ ඇමෙරිකානු ඩොලර් සඳහා ඉන්ධන මිලදී ගැනීම සඳහා ප්‍රමුඛතා පාරිභෝගික පහසුකම සඳහා ලියාපදිංචිය විවෘත කර ඇති බවයි.

ඒ අනුව අදාල අයදුම්පත් CPC වෙබ් අඩවියෙන් (www.ceypetco.gov.lk) බාගත කළ හැකි බවද සංස්ථාව පවසයි.

අමෙරිකානු ඩොලර වලින් ඉන්ධන මිලදී ගැනීමට අදාළ කොන්දේසි සහ අයදුම්කරු විසින් සම්පූර්ණ කළ යුතු  අවශ්‍යතා සිපෙට්කෝ වෙබ් අඩවියෙන්  නැරඹිය හැකි බවද ලංකා ඛනිජ තෙල් සංස්ථාව පවසයි.

අමෙරිකානු ඩොලර් වලින් ගෙවිය හැකි ඕනෑම සමාගමකට හෝ කර්මාන්තයකට සතිපතා සහතික කළ ඉන්ධන කෝටාවක් ලබා ගැනීම සඳහා ලංක ඛනිජ තෙල් නීතිගත සංස්ථාවේ පාරිභෝගික ගිණුමක් විවෘත කළ හැකි බව විදුලිබල හා බලශක්ති අමාත්‍යවරයා පසුගිය සතියේ නිවේදනය කළේය.

කෙසේ වෙතත්, පාරිභෝගිකයන් මාසයකට පෙර ඩොලර් ගෙවිය යුතු බවත්, ජූලි 12 වනදා සිට දිනපතා හෝ සතිපතා ඉන්ධන නිකුත් කරන බවත් අමාත්‍යවරයා පැවසීය.

දැනටමත් මුදල් ගෙවා ඇති ගනුදෙනුකරුවන්ට ඔවුන්ගේ කෝටාව ජූලි 12 වනදා සිට ලැබෙනු ඇති බවද අමත්‍යය කාංචන විජේසේකර මහතා පැවසීය.