අද (ජූලි 5) පාර්ලිමේන්තුවේදී ප්‍රකාශයක් කරමින් හිටපු ජනාධිපති මෛත්‍රීපාල සිරිසේන මහතා පවසා සිටියේ තමාව පාස්කු ප්‍රහාරයේ චූදිතයෙකු කිරීම සඳහා කුමන්ත්‍රණයක් පවතින බවයි.

එහිදි වැඩිදුරටත් කරුණු දක්වමින් හිටපු ජනාධිපතිවරයා පවසා සිටියේ, කිසිදු රටක ත්‍රස්තවාදීන්ට නඩු නොදමා රටේ නායකයාට නඩු පැවැරීමක් සිදු නොකරන බව ය.

එහිදී වැඩිදුරටත් කරුණු දක්වමින්,

“පාස්කු ප්‍රහාරයට අද වෙනකල් හිරේ ඉන්න අත්අඩංගුවට ගත්ත බරපතළ ත්‍රස්තවාදීන් විශාල පිරිසකට නඩු දාලා නෑ . එතකොට ඒ මේ ලෝකේ කොහේවත් රටක ත්‍රස්ත ප්‍රහාරයක් ඇතිවුණාම ත්‍රස්තවාදීන්ට නඩු දාන්නේ නැතුව ඒ රටේ රාජ්‍ය නායකයාට නඩු දාලා නෑ. අමෙරිකාවේ සැප්තැම්බර් 11 සිද්ධියේදී 50,000ක් මැරිලා ජනාධිපතිවරයට තියා ආරක්ෂක හෝ බුද්ධි අංශවලටවත් නඩු දැම්මේ නෑ.අපේ රටත් එක්ක ලෝකේ රටවල් 27කට පාස්කු ප්‍රහාරය එල්ල වුණා.ඒ කිසි ම රටක රාජ්‍ය නායකයෙක් මේ සම්බන්ධයෙන් වැරදිකාරයෙක් කරලා නඩුවක් දාලා නෑ. මේකට මාව චූදිතයෙක් කිරීම සම්පූර්ණයෙන් ම දේශපාලන කුමන්ත්‍රණයක් කියන එක මම බොහොම පැහැදිලිව කියනවා.”