තෙල් නිෂ්පාදනය කරන රටවල සමාගම්වලට ඉන්ධන ආනයනය සහ සිල්ලර විකුණුම් වෙළඳපොළ විවෘත කිරීමට අමාත්‍ය මණ්ඩලය කොළ එළියක් දක්වාඇති බව වාර්තා වේ.

ශ්‍රී ලංකා මහ බැංකුවෙන් හෝ අනෙකුත් බැංකුවලින් ඉන්ධන ආනයනය කිරීමේදී විදේශ විනිමය අවශ්‍යතා නොමැතිව ක්‍රියාත්මක වීමට ඇති හැකියාව මත මෙම සමාගම් තෝරා ගනු ලබන බව විදුලිබල හා බලශක්ති අමාත්‍ය කාංචන විජේසේකර මහතා ට්විටර් පණිවුඩයක් නිකුත් කරමින් කියා සිටියේය.

අමාත්‍යවරයා  පවසන පරිදි, තෝරාගත් සමාගම්වලින් අයකරනු ලබන සේවා ගාස්තුවක් සමඟ ප්‍රවාහන, තොග ගබඩා කිරීම සහ බෙදා හැරීම සඳහා ලංකා ඛනිජ තෙල් නීතිගත සංස්ථාව සේවා සපයන්නා වනු ඇත.

සිපෙට්කෝ ආයතනයට අයත් දැනට පවතින බෙදුම්හල් 1,190 න් තෝරාගත් බෙදුම්හල් සහ නව බෙදුම්හල්ද ලංකා අයිඕසී සමාගමට සහ තෝරාගත් නව සමාගම් සඳහා ලබා දෙන බව ඔහු වැඩිදුරටත් පැහැදිලි කළේය.
විධිමත් ක්‍රියාපටිපාටිය අනුගමනය කරමින් තෙල් නිෂ්පාදනය කරන රටවල තෝරාගත් සමාගම් සමඟ දීර්ඝ කාලීන ගිවිසුම්වලට එළඹීම සඳහා වූ යෝජනාව විදුලිබල හා බලශක්ති අමාත්‍යවරයා විසින් සභාගත කරන ලදී.

ආසන්න වශයෙන්, ශ්‍රී ලංකාවේ ඉන්ධන ඉල්ලුමෙන් 90% ක් ඛනිජ තෙල් නීතිගත සංස්ථාව විසින් සපුරාලන අතර ඉතිරි 10% ශ්‍රී ලංකාවේ ඉන්දියන් ඔයිල් සමාගම අනුබද්ධිත ලංකා අයි ඕ සී සමාගම විසින් ඉටු කරනු ලැබේ.

මේ අතර ශ්‍රී ලංකාව තුළ පවතින විදේශ විනිමය අර්බුදය හේතුවෙන් අඛණ්ඩව ඉන්ධන සැපයීම සහතික කිරීම අභියෝගයක් වී ඇති බව රජයේ ප්‍රවෘත්ති දෙපාර්තමේන්තුව නිවේදනයක් නිකුත් කරමින් කියා සිටී.

ඒ අනුව, විදේශීය තෙල් නිෂ්පාදනය කරන රටවල තෝරාගත් සමාගම් සමඟ අත්සන් කරන දිගුකාලීන ගිවිසුම් මඟින් ශ්‍රී ලංකාවේ විදේශ විනිමය ප්‍රශ්නයට පීඩනයක් එල්ල නොවන අයුරින් තම තමන්ගේ මුදල් යොදවා ඉන්ධන ආනයනය කර විකිණීමට ඉඩ සැලසේ.