ලංකා විදුලි බල මණ්ඩල ඉංජිනේරු සංගමයේ සභාපති අනිල් රංජිත් මහතා මාධ්‍යය වෙත අදහස් දක්වමින් පවසා සිටියේ ඊයේ (08) රාත්‍රී පැවැත්වු ජනාධිපතිවරයා සමඟ පැවති සාකච්ඡාවකින් අනතුරුව වර්ජනය තාවකාලික ව අත්හිටුවීමට තීරණය කළ බවයි.

එහෙත් වැඩවර්ජනය හේතුවෙන් මේ වනවිට කොළඹ, ගම්පහ සහ මහනුවර දිස්ත්‍රික්වල බොහෝ ප්‍රදේශවල මේ වන විට විදුලිය විසන්ධි වී ඇති බව ලංකා ලීඩ් වෙබ් අඩවිය වෙත වාර්තාවේ.

විදුලිබල පනතට ගෙන එන සංශෝධනවලට විරෝධය පළ කරමින් ලංකා විදුලිබල මණ්ඩලයේ ඉංජිනේරු සංගමය ඇතුළු සංගම් කිහිපයක් ඊයේ මධ්‍යම රාත්‍රී සිට වැඩ වර්ජනයක නිරතවීමට තීරණය කර තිබුණු අතර ඒ හේතුවෙන් අද (09) උදෑසන 8.00 වන විට දිවයින පුරා විදුලිය විසන්ධි වීමක් සිදුවනු ඇති බව අදාළ වෘත්තීය සමිති සඳහන් කළේය.

මේ අතර ඊයේ පාර්ලිමේන්තුවේදී ද අග්‍රාමාත්‍ය රනිල් වික්‍රමසිංහ මහතා සහ විෂය භාර අමාත්‍ය කංචන විජේසේකර මහතා සඳහන් කළේ, රටේ පවතින තත්ත්තවය හමුවේ වැඩ වර්ජනයක නිරත වීම කිසිසේත් අනුමත කළ නොහැකි බවය.

වැඩවර්ජනය සඳහා විදුලිබල මණ්ඩලයේ තාක්ෂණික ඉංජිනේරු සංගමයේ සභාපති ඒ.නිශාන්ත මහතා සඳහන් කළේ, අදාළ වැඩ වර්ජනය මේ මොහොතේ පිළිගත නොහැකි බවත් ඒ අනුව වැඩවර්ජනයට සහාය ලබානොදෙන බව ද ප්‍රකාශ කළේය.