ඉල්ලුමට සරිලන සැපයුමක් සිදු කිරීමට තරම් නිෂ්පාදනයක් සිදු නොවීම මත ඉන්දියාව තිරිඟු පිටි අපනයනය කිරීම තහනම් කර ඇති බව ඉන්දීය ප්‍රවෘත්ති ආයාතන වාර්තා කර සිටී. ඉන්දියානු රජයේ එම තීරණයත් සමඟම ලෝක වෙළඳපළේ තිරිඟු පිටි මිල ශීඝ්‍රයෙන් ඉහළ ගොස් තිබේ.

ඇමරිකා එක්සත් ජනපදයේ චිකාගෝ තිරිඟු පිටි දර්ශකය සියයට 5.9කින් ඉහළ යාමට අදාළ තහනම පිළිබඳව නිවේදනය බලපා ඇති බව පවසන ආර්ථික විශේෂඥයෝ එම මිල ඉහළ යාම මාස දෙකක කාලයක් තුළ තිරිඟු පිටි මිල දර්ශකය මෙතරම් ප්‍රතිශතයකින් ඉහළ ගිය ප්‍රථම අවස්ථාව බවද ඔවුහු පවසති.

මේ වන විට උතුරු ඉන්දියාවේ පවතින අධික උණුසුම් කාලගුණ තත්ත්වය හේතුවෙන් තිරිඟු අස්වැන්න විනාශ වී යෑම මෙන්ම යුක්රේන යුද්ධය හේතුවෙන් ඉන්ධන මිල ඉහළ යෑම ඉන්දීයාවේ ඉල්ලුමට සරිලන සැපයුමක් ලබාදීමට ඉන්දීය ගොවියන්ට නොහැකි වී තිබේ. ඒ අනුව රට තුළ තිරිඟු පිටි මිල වාර්තාගත අයුරින් ඉහළ යාමට මෙම තත්වය හේතුවී ඇති බව ඉන්දීය කෘෂි විද්‍යාඥයන්ගේ මතයයි. තිරිඟු පිටි මිල ඉහළ යෑමත් සමගම ඉන්දියාවේ සියළු බේකරි නිෂ්පාදන මිල ගණන් ඉහළ ගොස් ඇති බව එරටින් ලැබෙන වාර්තා වලින් කියවේ. මේ අතර ඉන්දීය රජයේ නිලධාරින් පවසන්නේ තිරිඟු පිටි අපනයනය තහනම් කළද ආහාර හිඟයකට මුහුණ පා ඇති රටවලට හා දැනටමත් තිරිඟු පිටි සැපයීමට අදාළ ලේඛන සපයා ඇති රටවලට තිරිඟු පිටි අපනයනය කිරීම සිදු කරන බවයි.