සියලුම පොලිස් ස්ථාන වෙත, පොලිස් මූලස්ථානය විසින් නියෝගයක් නිකුත් කරමින් පවසා ඇත්තේ අවශ්‍ය අවස්ථාවලදී වෙඩි තැබීමට බලය ලබා දුන් ඇත.

එලෙසම ප්‍රචණ්ඩකාරී පිරිස් විසින් ජීවිත හානි හෝ කොල්ලකෑම් සිදු කිරීමේ අරමුණින් වාහන නවතා සිදුකරන පරීක්ෂාවන් වැළැක්වීමට පියවර ගැනීමට පොලීසියටද උපදෙස් දී තිබේ.

ඒ අනුව දේපළවලට හානි සිදුකිරීම, කොල්ලකෑම හෝ ජීවිත හානි, පහරදීම් වැළැක්වීමටද උපරිම පියවර ගන්නැයිද සියලුම පොලිස් ස්ථාන වෙත උපදෙස් ලබාදී ඇත.

මේ අතර ජනාධිපති මන්දිරය ඉදිරිපිට ගාලු මුවදොර පිටියේ සිටින විරෝධතාකරුවන්ට එම ස්ථානයෙන් ඉවත් වන ලෙස ශ්‍රී ලංකා පොලීසිය විසින් ශබ්ද විකාශන මාර්ගයෙන් දැනුම් දී තිබේ.

එම නිවේදනය මගින් රට තුළ ඇඳිරි නීතිය පනවා ඇති බවත් එම කාලය තුල ප්‍රසිද්ධ ස්ථානයන්හි ගැවසීම තහනම් කර ඇති නිසා එම ස්ථානයෙන් ඉවත් වන්නැයි දැනුම් දෙන බවත් පවසා සිටී.

ගෝඨාභය රාජපක්ෂ මහතාට ජනාධීපති දූරයෙන් ඉවත් වන ලෙස බල කරමින් මෙම විරෝධතාවය දැනට මාසයකට වැඩි කාලයක් තිස්සේ ගාළු මුවදොර පිටියේ පැවැත්වෙයි.