ගෝඨා ගෝ ගම සහ මයිනා ගෝ ගම ඇතිවීම හා පැවතීම පිළිබඳව ලංකා ලීඩ් නිවුස් වෙබ් අඩවියේ විමර්ශණ අංශයට ප්‍රකාශයක් කරමින් ගෝලීය ශ්‍රී ලාංකික සංසදයේ යසස් ධර්මදාස මහතා පවසා සිටියේ අරගලය තුල කුමන යටි අරමුණු සහ පසුබිම් පැවතියද මහා පොදු සාධකය වන්නේ රාජපක්ෂ වරුන්ට එරෙහිව නිරන්තරයෙන් කෙරෙන හොරා හොරා චෝදනා බවයි. එහිදී යසස් ධර්මදාස මහතා කළ සම්පූර්ණ ප්‍රකාශය පහතින්,

“මේ වෙනකොට තෙල් මිළ වැඩිකරා කියල සියදිවි නසා ගත්‍ත කෙනෙක්ගෙ වීඩියෝවක් සංසරණය වෙනව. ආහාර කොල්ල කෑමේ ආරම්භයක් හැටියට ආමර්වීදියේ ගෑස් ලොරියක් මංකොල්ල කාල තියෙනව. හෙට අනිද්ද වෙනකොට සුපර්මාකට් හා ෆාමසිත් කොල්ල කන්න පටන් ගනීවි. මේ සියළු කරුණුවල පිටුපස ඇත්තේ රාජපක්ෂවරුන්ගේ අදූරදර්ශී කමයි. ඒ කෙසේ වෙතත්, ඇත්ත වශයෙන්ම රට වෙනුවෙන් උද්ගෝෂණය කරනවනම්, පාරට බහිනවනම්, හර්තාල් කරනවනම් පහුගිය රජය කාලෙ ඉහටත් උඩින් කාරණා තිබුන. මහබැංකු හොරකම, හම්බන්තොට වරාය කුනුකොල්ලෙට දීම, රණවිරුවන් යුද අපරාධකරුවන් කිරීම, සාලාව කඳවුර පුපුරවා හැරීම, විල්පත්තුවෙ ඉඩම් මංකොල්ලය, ආගමික අන්තවාදීන්ට යටවීම, රටට අහිතකර ගිවිසුම් ගැසීම ආදී දේ සිදුවුනා. නමුත් ඒවා පිළිබඳව ජනතාවට අරගල කරන්න අවශ්‍ය තරමට තෙරපීමක් ලැබුනෙ නෑ. හිතුවෙ අපි හම්බකරොත් අපිට කන්න පුළුවන්, ඔය දේශපාලනය අපිට වැඩක් නෑ කියල හිතුව. හේතුව තමයි මේ පාර වගේ මාස ගනන් දිග ඇදි ඇදී යන ගෑස් පෝලිම්, තෙල් පෝලිම්, විදුලිය කැපීම් නොමැති වීම. ඒක සිද්ධවෙන මැජික් එක උනේ වරාය විකුණල ගත්ත සල්ලි වලිනුත්, ඩොලර් බිලියන 14 ක ජාත්‍යන්තර ස්වෛරී බැඳුම්කර වලින් ගත්ත මුදල් වලිනුත් කරේ ජනතාවට කන්න බොන්න තෙල් ගහන්න බෙහෙත් ගන්න දුන්න එක. මේ ආණ්ඩුව ආවට පසුව ණය ගත්තෙ නෑ, තිබුන ණයත් ගෙව්ව කිව්වට මිනිස්සුන්ට වැඩක් නෑ. ඒක තේරෙන්නෙත් නෑ. දැන් පෙනෙනවනෙ බඩට දැනුනම තමයි ජනතාව නැගිටින්නෙ කියල. ඒකට අවසාන ප්‍රථිඵලය ෆෙඩරල්ද ඔරිමිත්තනාඩුද දේවරාජ්‍යයද කඩුපහරද අදාල නෑ. ඒ සියල්ලත් එක්කල අත්වැල් බැඳන් එන්නෙ. රට වැඩියෙන්ම ණය කළ අයත් දැන් ආණ්ඩුවට මුදල් නැතිකමට බනිනව.

ගෝඨා විතරක් නොවෙයි සියළුම රාජපක්ෂවරු මේ චෝදනාවලට පිළිතුරු දීමේදී ෆේල්. රාජපක්ෂ වරුන්ට හැකිනම් ඔය හොරා හොරා චෝදනාවලට නිසි කලට නිසි පිළිතුරු දෙන්න, මම හිතන්නෙ නෑ යටි අරමුණු තියෙන කූඨ උද්ගෝෂකයින් හැර වෙන අය, එනම් රාජපක්ෂ හොරා හොරා කියන සටන් පාඨය පමණක් දරන අහිංසක උද්ඝෝෂකයින් ඔය ගෝඨා ගෝ මයිනා ගෝ වලට එකතු වේවි කියා.

කෙටි පණිවිඩ ජෙනරේෂන් එකත් යමක් බොරුවක් බව දැනගත් විට ඒ බොරුව තවත් කර තියන් යන්න සූදානම් නෑ. උදාහරණයක් ලෙස අර උගන්ඩාවට යවපු ඩොලර් බිලියන 18 පිළිබඳව චෝදනාව. හිටපු රේගු අධ්‍යක්ෂක පරාක්‍රම බස්නායක මහතාගේ පැහැදිලි කිරීමෙන් පසුව අද ඒ ගැන කවුරුවත් කතා නෑ. බස්නායක මහතා ඒ පිළිබඳව පැහැදිලි නොකරනම් ඒකත් අර ජනගත කළ ෆයිල් ගොඩට එකතුවෙන්න තිබුන. දැන් අළුත්ම එක තමයි ඉන්දියාවෙන් බෙහෙත් ගන්න දීපු ක්‍රෙඩිට් ලයින් එකෙන් යකඩ ගන්නව කියල මීම්ස් සංසරණය.  ඇත්ත කතාවනම් ඉංදියාවෙන් ලැබෙන බිලියන එකෙන් මිලියන 250 ක් ලැබෙන්නෙ අනිත් කර්මාන්ත සඳහා අවශ්‍ය ද්‍රව්‍ය මිළදී ගැනීම සඳහායි. ඉන් මිලියන 49 ක් තමයි දැන් ඔය කර්මාන්ත සඳහා මිල ස්ථායී කිරීමට හිඟ ද්‍රව්‍ය වලට යොදාගෙන තියෙන්නෙ. එයින් එක ගොඩනැගිලි කර්මාන්තයට අවශ්‍ය ද්‍රව්‍යක් තමයි යකඩ. මේ විස්තර පැහැදිලි නොකර සිටීමෙන් කෙටි පණිවුඩ ජෙනරේෂන් එක තව තවත් ඒ ගැන පලිප්පු දම දමා මීම්ස් හදනව.

උද්ඝෝෂණ වල යටි අරමුණ සහ පසුබිමේ ඇත්තේ අන්තවාදී සහ බෙදුම්වාදී හස්තයන් යැයි දැන් පැහැදිලිව පෙනෙන්න තියෙනව. මෙය බොහොම බරපතල තත්ත්වයක්. එම නිසා අහිංසක අරගල කරුවන් කවුරුද කූඨ අරගල කරුවන් කවුරුද කියල හඳුනා ගත යුතුයි. ඒ සඳහා පහත සඳහන් යෝජනා රාජපක්ෂලට ක්‍රියාත්මක කළ හැකියි. ඒ යෝජනා ජනතාව වෙත ඉදිරිපත්කර ප්‍රතිඥාවක් ලබාදීම ප්‍රථමයෙන් සිදුකළ යුතුයි. එම යෝජනානම්:

01) සියළුම හොරකම් කරාය, ගජමිතුරන්ට සැළකුවාය, විදේශවල අයඨ ලෙස ආයෝජනය කළාය යන චෝදනා විභාග කිරීමට විපක්ෂයෙන් සැදුම්ලත් කමිටුවක් පත්කිරීම;

02) එම චෝදනා සියල්ල විභාග කිරීමට අල්ලස් හෝ දූෂණ කොමිසමක් පත්කිරීම;

03) ජනපති තනතුර ලැබීම හේතුවෙන් අහෝසිවුන අධිකරණ ක්‍රියාවලි නැවත ආරම්භ කිරීම;

04) තාක්ෂණික කාරණාමත ඉවත දැමීමට සිදුවුන මල්වානේ නිවාසය, බැඳුම්කර චෝදනා වැනි කූඨ ගණුදෙනු පිළිබඳ අධිකරණ ක්‍රියාවලිය නැවත ආරම්භ කිරීම. මේ සඳහා දැනටමත් පාර්ලිමේන්තුවට යෝජනාවී ඇති අල්ලස් හෝ දූෂණ පනතේ සංශෝධන වහා අනුමත කිරීමට කටයුතු කිරීම;

05) දැනටමත් කෝප් කමිටුව මගින් චෝදනා කර ඇති සීනි සහ සහල් බදු අවභාවිත කර අධිලාභ ලැබූ ධනය නැවත අයකර ගැනීම සහ ඊට දායකවූ සියල්ලන්ටම ඳඬුවම් කිරීම;

06) විවිධ පක්ෂ වලින් කර ඇති සහ ගෙන ඒමට යෝජිත දූෂණ සහ වංචා චෝදනා කඩිනම්ව ගෙනෙන ලෙස එම පක්ෂ වලට විවෘතව අභියෝග කිරීම. (3 දින ජනගතකළ චෝදනා මිටිය ආරම්භයක් ලෙස සැළකිය යුතුයි);

07) චෝදනා වලට වරදකරු වන්නේනම් ඳඬුවම් විඳීමට සූදානම් බවට ප්‍රකාශය සහ වන්දි ලබාදීමට, නැවත අයකර ගැනීමට කටයුතු කිරීම;

08) කැබිනට් කමිටුවද නොසළකා හැර අත්සන් කිරීම සිදුකළ සියළු ගැසට්, ගිවිසුම් අහෝසි කිරීම;

09) මහබැංකු වංචාව නැවත විමර්ෂණය හා වෝහාරික වාර්තාව ඇතුළු සියළු වාර්තා ප්‍රසිද්ධ කිරීම;

10) පාස්කු කොමිසමේ සඳහන් නිර්දේශ ක්‍රියත්මක කිරීම සහ එහි සිදුවූ දෝශයන් පිළිබඳව විමර්ශනය සඳහා කොමිසමක් පත්කිරීම;

11) 2021 පෙබරවාරි අනුමත කරණලද කරුණු 57 කින් යුක්ත අන්තවාදය තුරන්කිරීමේ යෝජනා ක්‍රියාත්මක කිරීම;

12) දේශපාලනික අතපෙවීම් මගින් විදේශ විනිමය සංචිතයන්ට හානි කිරීම (උදා: රොකට් වෙනුවෙන් යෙදවූ මුදල්), ප්‍රාදේශීයව දේශපාලකයන්ට අනුබද්ධව දූෂකයන් පරපුරක් බිහිකිරීම (අවශ්‍යනම් වෙනම ලැයිස්තුවක් බාරදෙන්නෙමු) චෝදනාවට පිළිතුරුදීම;

13) ජනතාව සමග ඉහත කරුණු පිළිබඳව අවබෝධතා ගිවිසුමකට එළඹීම.

යන කරුණු මූලික වශයෙන් සඳහන් කළ හැක.

ඔය කියන යෝජනා ක්‍රියාත්මක කළහොත් අරගලයෙන් අහිංසක උද්ඝෝෂකයින් ඉවත්වී අරගල භූමියේ කූඨ අරගලකරුවන් පමණක් ඉතිරිවේවි. එයාලට වැඩිකල් පවතින්න හැකිවන්නේ නෑ. අන්තර්වාර පාලනය තුල මෙම යෝජනා ක්‍රියාත්මක කිරීමට සාධාරණ හා බලපෑමෙන් තොර වටාපිටාවක් ගොඩ නැඟෙනව. අහිංසක උද්ඝෝෂකයින් මෙම සටන්පාඨය තමුන් අතට ගත යුතුයි.

මෙම යෝජනා ක්‍රියාත්මක නොකර බලයෙන් ඉවත් වෙන්නට සිදුවුවහොත් රාජපක්ෂවරුන්ට නැවත කිසිදු දේශපාලනයක නිරතවීමට ඉඩක් ලැබේවි කියා හිතන්න අපහසුයි. ඊට වැඩිය භයානක කාරණය වන්නේ රට බෙදුම්වාදීන්ට, ආගම්වාදීන්ට සහ අන්තවාදීන්ට යටව යෑමයි.”