2013 වසරේ ජනතා වතු සංවර්ධන මණ්ඩලය (JEDB), ශ්‍රී ලංකා රාජ්‍ය වැවිලි සංස්ථාවට සහ ඇල්කඩුව වැවිලි සමාගමට අයත් වතු කම්කරුවන් 12,000කට ආසන්න පිරිසකගේ සේවක අර්ථ සාධක අරමුදල් (EPF) සහ සේවා නියුක්තයන්ගේ භාර අරමුදල් (ETF) පාරිතෝෂිකය අදාල වර්ෂය තුළ රු.මිලියන 1,888ක් නොගෙවීම සම්බන්ධයෙන් ශ්‍රී ලංකා මානව හිමිකම් කොමිෂන් සභාවට පැමිණිල්ලක් ලැබී තිබේ.

එම පැමිණිල්ලේ වගඋත්තරකරුවන් ලෙස වැවිලි කර්මාන්ත අමාත්‍යංශය, කම්කරු අමාත්‍යංශය, මුදල් අමාත්‍යංශය, රාජ්‍ය ව්‍යවසාය හා මහනුවර සංවර්ධන අමාත්‍යංශය, කම්කරු දෙපාර්තමේන්තුව සහ ශ්‍රී ලංකා මහ බැංකුව ද නම් කර ඇතැයි ශ්‍රී ලංකා මානව හිමිකම් කොමිෂන් සභාව ප්‍රකාශ කර ඇත.

එමෙන්ම, එම පාරිතෝෂිකය නොගෙවීම සම්බන්ධයෙන් සියලු ම වගඋත්තරකාර පාර්ශව වෙත 2019 වසරේදී නිර්දේශ නිකුත් කළ නමුත් වගඋත්තරකාර පාර්ශව එම නිර්දේශ ක්‍රියාත්මක කිරීමට අපොහොසත් වී ඇති බවද කොමිෂන් සභාව පැවසීය.

එබැවින් සියලු ම පාර්ශ්ව කොමිසම වෙත කැඳවා නිර්දේශවල ප්‍රගතිය පිළිබඳව විමසීමට ශ්‍රී ලංකා මානව හිමිකම් කොමිෂන් සභාව කටයුතු කර ඇති අතර වතු කම්කරුවන්ගේ සියලු ම ගෙවිය යුතු ගෙවීම් 2022 නොවැම්බර් 2 වන දින හෝ ඊට පෙර ගෙවීමට ජනතා වතු සංවර්ධන මණ්ඩලය භාර ගත් බව ශ්‍රී ලංකා මානව හිමිකම් කොමිෂන් සභාව වැඩිදුරට ත් පැවසීය.