ආණ්ඩුවේ පාර්ශව අතර සාකච්ඡාවක් නොමැති වීම නිසා වර්තමාන දේශපාලන අර්බූදය ඇතිවූ බවට හිටපු ජනාධිපති මෛත්‍රීපාල සිරිසේන මහතා විසින් සිදු කරණ ලද  ප්‍රකාශය පිළිබඳව ලංකා ලීඩ් පුවත් වෙබ් අඩවිය විසින් ජාතික සංවිධාන වල මතය විමසන ලදී.

මේ ජාතික සංවිධාන එකමුතුවේ මාධ්‍යය ප්‍රකාශක වෛද්‍යය වසන්ත බණ්ඩාර මහතාගේ අදහස ඔහුගේ වචනයෙන්,

“මෛත්‍රීපාල සිරිසේන මැතිතුමා කියන කථාව අපි 90%ක් පිළිගන්නවා, ඒත් ප්‍රශ්නය තියෙන්නේ ආණ්ඩුවේ අභ්‍යයන්තර සාකච්ඡාවක් නැති වීම නිසා ඇති වූ අර්බූදය සර්ව පාක්ෂික සමුළුවකින් විසඳන්නේ කොහොමද කියන එකයි. අභ්‍යයන්තර සාකච්ඡාවක් නැතිවීම නිසා ඇති වූ ප්‍රශ්නය එසේම තිබියදී බාහිර පාර්ශව එම සාකච්ඡාවට එකතු කර ගැනීම මගින් විසඳෙන්නේ කෙසේදැයි පැහැදිලි නැහැ. එතුමන්ලා රජයට යෝජනා 15 ක් ඉදිරිපත් කළා කියනව.සර්ව පාක්ෂික සමුළුව ඉන් එකක්. ඉතිරි 14 ගැන අපි දන්නේ නැහැ.ඒ නිසා පළමුව එම යෝජනා මහජනයාට ඉදිරිපත් කළ යුතුයි. දෙවනුව අභ්‍යයන්තර සාකච්ඡාවක් නැතිවීමේ ප්‍රශ්නය බාහිර පාර්ශව සමඟ සාකච්ඡාවකින් විසඳන්නේ කෙසේ දැයි පැහැදිලි කළ යුතුයි.”