ජාතික විගණන කාර්යාලයේ විශේෂ වාර්තාවකට අනුව ප්‍රමිතියෙන් තොර බවට තහවුරුවූ ආහාර ද්‍රව්‍ය ඇතුළු භාණ්ඩ 112 ක් මිනිස් පරිභෝජනය සඳහා වෙළෙඳ පොළට නිකුත්වී ඇති බව වාර්තාවේ.

පාරිභෝගික කටයුතු පිළිබඳ අධිකාරිය සාම්පල 299ක් සම්බන්ධයෙන් 2020 වර්ෂයේදී පැවැත්වූ පරීක්ෂණයකදී මෙම භාණ්ඩ වර්ග 112 නියමිත ප්‍රමිතියෙන් හා පිරිවිතරයන්ගෙන් තොර බවට තහවුරුවී තිබියදී ඒවා තහනමට ගෙන රඳවා තබා ගැනීමට කටයුතු කර නැති බවට තොරතුරු අනාවරණයවූ බව ජාතික විගණන කාර්යාලය පවසයි.

මේ සම්බන්ධයෙන් ජාතික විගණන කාර්යාලය නිලධාරීන් කළ විමසුමකදී පාරිභෝගික කටයුතු පිළිබඳ අධිකාරියේ ප්‍රධානීන් පවසා ඇත්තේ නියැදි පරීක්ෂාවන්ගෙන් අහිතකර ප්‍රතිඵල ලැබුණත් එම භාණ්ඩ තොග රඳවා ගැනීමට හෝ තහනමට ගැනීමට පාරිභෝගික කටයුතු පිළිබඳ අධිකාරී පනතෙන් ප්‍රතිපාදන සැලසී නැති බවයි.

මේ අතර 020 ජුලි 29 දිනැති අංක 2186/17 දරණ ගැසට් පත්‍රය මගින් රසායනාගාර පරීක්ෂණ සඳහා මිල පාලනයක් ඇති කර තිබුණද එහි ප්‍රතිඵල පාරිභෝගිකයා අතරට ගිය බවට සමීක්ෂණ කිරීම සඳහා පාරිභෝගික කටයුතු පිළිබඳ අධිකාරිය කිසිදු වැටලීමක් කර නැති බවද ජාතික විගණන කාර්යාලය පවසයි.