ශ්‍රී ලාංකේය සිනමාවේ සහ රූපවාහිනියේ ප්‍රවීණ රංගන ශිල්පයෙකු සහ විකට නළුවෙකු වූ බර්ටි ගුණතිලක මහතා ඊයේ(මාර්තු 06) උදෑසන අභාවප්‍රාප්ත විය.

කහවත්ත මූලික රෝහලේ ප්‍රතිකාර ලබමින් සිටි ගුණතිලක මහතා අභාවප්‍රාප්ත වන විට 98 වැනි වියේ පසුවිය.

1924 අගෝස්තු 02 වැනි දින මහනුවර අම්පිටියේදී උපත ලැබූ ගුණතිලක මහතා මහනුවර අම්පිටිය ප්‍රාථමික විද්‍යාලයේ, මහනුවර ශ්‍රී සංඝරාජ මහා පිරිවෙනේ සහ දේශීය වෛද්‍ය විද්‍යා ආයතනයේ ආදි ශිෂ්‍යයෙකි.

බර්ටි ගුණතිලක මහතාගේ ප්‍රථම රජයේ රැකියාව වන්නේ සහකාර ගුරු තනතුරයි. ඒ කුලියාපිටිය ගල්පොල විද්‍යාලයේ ශහ්කාර ගුරුවරයෙකු ලෙස ලැබුණු පත්වීමයි..

1947 දී ඔහු ‘ළමා පිටිය’ වැඩසටහන හරහා “රේඩියෝ සිලෝන්” සමඟ සම්බන්ධ වූ අතර, රේඩියෝ සිලෝන් විකාශය කළ ඔහුගේ ‘විහිළු තහළු’ නම් වූ විකට වැඩසටහන 1954 වර්ෂයේ සිට ජනප්‍රිය විය.

1951 දී බර්ටි ගුණතිලක රංගනයෙන් දායක වූ ‘බණ්ඩා නගරයට පැමිනිම’ චිත්‍රපටය තිරගත වූ අතර පසුව ඔහු ‘පෙම් මල් මාල’, “පාලම යට”, ‘මන මෝහිනී’, ‘සොමි බෝයිස්’ ඇතුළු තවත් චිත්‍රපට කිහිපයකම විකට චරිත නිරූපණය කරමින් රංගනයින් දායක විය.

ඔහු වසර ගණනාවක් ජාතික රූපවාහිනියේ විකාශය වූ ‘විනෝද සමය’ රූපවාහිනි විකට වැඩසටහන් මාලාවේ නිරූපණය කළ බොහෝ හාස්‍ය චරිත හරහා ප්‍රේක්ෂක සම්මානය ලබා ගත්තේය.