කොළඹ කොටස් වෙළෙඳපොළ සියලු කොටස් මිල දර්ශකය ඊයේ (24) දිනයේ දී ඒකක 560.71 ක පහළ යාමක් වාර්තා කළ බව පැවසේ. මෙය මෙතෙක් ඉතිහාසයේ තනි දිනක් තුළ සියලු කොටස් මිල දර්ශකයේ වාර්තා වූ දෙවැනි විශාලතම කඩා වැටීම විශ්ලේෂකයෝ පවසති. ඒ අනුව මෙම කඩා වැටීම දෙවැනි වන්නේ 2021 පෙබරවාරි 02 වැනි දින ඒකක 561.75කින් සියලු කොටස් මිල දර්ශකයේ වාර්තා වූ කඩා වැටීමට පමණි.

ඊයේ(24) දිනයේ ගනුදෙනු අවසානයේ දී සියලු කොටස් මිල දර්ශක අගය ඒකක 10,657.05 ක් ලෙසින් සටහන් වූ බව කොළඹ කොටස් වෙළෙඳ පොළ පවසයි.

S&P SL20 දර්ශකය ඒකක 3,954.12 ක් ලෙසින් වාර්තා වූ අතර එය ඒකක 197.45 කින් හෙවත් 5.21% කින් පහළ යන ලදී. ඊයේ දින ගනුදෙනු අතරවාරයේ දී S&P SL20 දර්ශකය පූර්ව ගනුදෙනු දිනයට සාපේක්ෂව 5% ක ප්‍රමාණයක් ඉක්මවා පහළ යාම හේතුවෙන් පස්වරු 1.42 සිට පස්වරු 2.12 දක්වා මිනිත්තු 30 ක කාලසීමාවක් සඳහා ගනුදෙනු අත්හිටුවීමක් ද සිදුකෙරුණි.

රු. බිලියන 3.71 ක පිරිවැටුමක් ඊයේ දින ගනුදෙනු හරහා වාර්තා විය.