කෙරවලපිටිය යුගදනවි විදුලි බලාගාරයේ මතභේදාත්මක ගිවිසුම අධ්‍යයනයේදී ඉතා බරපතල කරුණක් ඉස්මතු වන බව විද්වත්හු පවසති. ගිවිසුම් ප්‍රකාරව පැන නගින ගැටලුමය තත්ත්වයන් සමථයකට ගෙනඒම සඳහා බලාත්මක වන්නේ එංගලන්ත නීතිය බව ඔවුහු පවසති.

ඔවුහු වැඩිදුරටත් පෙන්වා දෙන්නේ ගිවිසුමේ රහස්‍යභාවය හා ප්‍රකාශනය පිළිබඳ කරුණු ඇතුළත් 13.1 (ආ වගන්තියේ දැක්වෙන්නේ ගිවිසුම අත්සන් කර වසර 02ක් ගතවන තුරු ඊට අදාළ කිසිදු පාර්ශ්වයක්, අනෙක් පාර්ශ්වයේ ලිඛිත අවසරයකින් තොරව ගිවිසුමෙහි කොන්දේසි සහ හුවමාරු කරගත් වෙනත් කිසිදු ලියකියවිල්ලක් හෝ ඊට අදාළ කරුණු හෙළි නොකළ යුතු බවයි.

13.3 වගන්තියට අනුව කිසිදු පාර්ශ්වයක් අනෙක් පාර්ශ්වයේ ලිඛිත කැමැත්තකින් තොරව ගිවිසුම සම්බන්ධයෙන් වූ අදහස් හුවමාරු කරගැනීම, කොන්දේසි පිළිබඳ පුවත්පත් නිවේදන හෝ වෙනයම් හෝ නිවේදන නොකළ යුතු බව දැක්වෙන බවද ඔවුහු පවසති.

කෙරවලපිටිය යුගදනවි විදුලි බලාගාරයේ රජය සතු කොටස් වලින් සියයට 40ක කොටස් අමෙරිකානු නිව් ෆෝට්‍රස් එනර්ජි සමාගමට පැවරීමට අදාළ ගිවිසුමට පසුගිය සැප්තැම්බර් 17වනදා අත්සන් තැබූ බව රජය නිවේදනය කඅළ අතර දේශපාලන පක්ෂ ඇතුළු වෘත්තීය සමිති ඉල්ලා සිටියේ හෙළි නොකරන ලද එම ගිවිසුම හෙළි කරන ලෙසයි.

එවන් පසුබිමක ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක මහතා එම ගිවිසුමේ පිටපතක් ඊයේ පාර්ලිමේන්තුවේදී සභාගත කළේය.