2017, 2018 සහ 2019 මූල්‍ය වර්ෂ සඳහා විගණකාධිපති වාර්තාව හා වර්තමාන කාර්යසාධනය පිළිබඳ පරීක්ෂා කිරීම සඳහා පරිසර අමාත්‍යාංශ නිලධාරින් රජයේ ගිණුම් පිළිබඳ කාරක සභාව හෙවත් කෝපා කමිටු වෙත කැඳවූ අවස්ථාවේදි, මහා භාණ්ඩාගාරය දැනුවත් නොකරමින් ව්‍යාපෘති 4 ක් සඳහා සෘජු විදේශ මූල්‍යාධාර වියදම් කර ඇති බවට අනාවරණය වී තිබේ.

මෙහිදී අමෙරිකානු ඩොලර් මිලියන 9.96ක් වටිනා ව්‍යාපෘති 3 ක් සහ යූරෝ මිලියන 1.86ක් වටිනා ව්‍යාපෘතියක් මෙලෙස සෘජු විදේශ මූල්‍යාධාර යටතේ ක්‍රියාත්මක වන බවට හඳුනාගෙන ඇති අතර ඒ සම්බන්ධයෙන් මහා භාණ්ඩාගාරයේ විදේශ සම්පත් දෙපාර්තමේන්තුව දැනුවත් කිරීමට කටයුතු කර නොමැති බව අනාවරණය වී ඇත.

ඒ අනුව ඉදිරියේදී මෙවැනි ආධාර ලැබීම සහ වියදම් කිරීම පිළිබඳව මහා භාණ්ඩාගාරය දැනුවත් කිරීමට කටයුතු කරන ලෙස කෝපා කමිටුව පරිසර අමාත්‍යාංශ නිලධාරින්ට උපදෙස් ලබා දී ඇති බව වාර්තාවේ.