එක්ස්ප්‍රස් පර්ල් නෞකාව ගිනි ගැනීමෙන් ඇති වූ පාරිසරික හානිය පිළිබඳව විධිමත් පරීක්ෂණයක් පවත්වන ලෙසත් එම අනතුර හේතුවෙන් ජීවනෝපාය අහිමිවූ ධීවරයන්ට වන්දි ගෙවන ලෙස ඉල්ලමින් ගොනුකර තිබූ මූලික අයිතිවාසිකම් පෙත්සම් පහක් සලකාබැලීම සඳහා දෙසැම්බර් මස 01 වනදා කැඳවන ලෙස ශ්‍රේෂ්ඨාධිකරණය නියම කළේය.

කාදිනල් අතිඋතුම් මැල්කම් රංජිත් හිමිපාණන්, සරත් ඉද්දමල්ගොඩ පියතුමා, පරිසරවේදනීයක වන ආචාර්ය අජන්තා පෙරේරා ඇතුළු පිරිසක් විසින් මෙම මූලික අයිතිවාසිකම් පෙත්සම් ඉදිරිපත්කර තිබේ.

මෙම පෙත්සම අද (09) සලකා බැලීම සඳහා එල්. ටී. බී. දෙහිදෙණිය, ප්‍රීති පද්මන් සූරසේන සහ මහින්ද සමයවර්ධන යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල ඉදිරියේ කැඳවනු ලැබීය.

එහිදී වගඋත්තරකාර පාර්ශ්වය වෙනුවෙන් පෙනී සිටි නීතිඥවරු එය සලකා බැලීම සඳහා වෙනත් දිනයක් ලබා දෙන්නැයි ඉල්ලා සිටි බව අප අධිකරණ වාර්තාකරු පැවසීය.

එම අවස්ථාවේදී පෙත්සම්කාර පාර්ශවයේ නීතිඥවරු අධිකරණය හමුවේ පෙන්වා දුන්නේ මෙම පෙත්සම් සලකාබැලීම මීට පෙර තුන් වතාවක්ම කල් ගොස් ඇති බවත් අදාළ නෞකාවෙන් සිදුවන පාරිසරික හානිය දිනෙන් දිනෙන් දින උග්‍ර වෙමින් පවතින බවත් ය.

මේ හේතුවෙන් කොළඹ සහ ගම්පහ දිස්ත්‍රික්කවල වෙසෙන ධීවර ජනතාව දැඩි පීඩාවකට පත්ව සිටින බවද එම නීතිඥවරු සඳහන් කළහ.

මේ හේතුවෙන් පෙත්සම සලකා බැලීම සඳහා කඩිනම් දිනයක් නියමකරන ලෙස ඔවුන් අධිකරණයෙන් ඉල්ලා සිටියේය.

එම ඉල්ලීම පිළිගත් ශ්‍රේෂ්ඨාධිකරණය පෙත්සම සලකාබැලීම සඳහා දෙසැම්බර මස 01 වනදා කැඳවන ලෙස නියෝග කළේය.