කෙරවලපිටිය යුගදනවි බලාගාරයේ කොටස් 40%ක් අමෙරිකානු සමාගමකට ලබාදීමේ ගිවිසුම පිළිබඳව ආණ්ඩුවේ හවුල්කාර පක්ෂ ඉල්ලූ සාකච්ඡාව ජනාධිපතිවරයා ප්‍රතික්ෂේප කළ පසුබිමක පාර්ලිමේන්තු මන්ත්‍රී ටිරාන් අලස් මහතාගේ කාර්යාලයේදී ආණ්ඩුවේ හවුල්කාර පක්ෂ 11ක නායකයින් සහ නියෝජිතයින් අද(23) පැය 05ක් ඒ සම්බන්ධව සාකච්ඡා කළේය.

එම සාකච්ඡාවෙන් පසුව අමාත්‍ය උදය ගම්මන්පිල මහතා මාධ්‍යයට අදහස් දක්වමින් පවසා සිටියේ ජනාධිපති ගෝඨාභය රාජපක්ෂ මහතා සමඟ හෙට (24) දින සාකච්ඡා කිරීමට බලාපොරොත්තු වන බවයි.

එහිදී වැඩිදුරටත් පවසා සිටියේ ආණ්ඩු පක්ෂයේ පාර්ලිමේන්තු මන්ත්‍රී කණ්ඩායම් රැස්වීම හෙට ජනාධිපතිවරයා සමග පැවැත්වෙන අතර එහිදී මේ පිළිබඳව සාකච්ඡා කිරීමට බලාපොරොත්තු වන බවයි.

ප්‍රජාතන්ත්‍රවාදී වාමාංශික පෙරමුණේ නායක අමාත්‍ය වාසුදේව නානයක්කාර මහතා අදහස් දක්වමින්,

“අපි බලාගාරයේ ගිවිසුමට විරුද්ධයි . අපි ඒකමතිකභාවයකට ආවා. අත්සන් කරලා ඉවර නෑ කිසිදෙයක්. දේශපාලන බලය මතයි සියල්ල තීරණය වන්නේ.”