ඉන්දියාවේ මතභේදයට තුඩුදුන් ගොවිපොළ නීතියට විරෝධය පළ කරමින් පන්ජාබ් සහ හර්යානා ප්‍රාන්තයන්හි සිය ගණනක් ගොවීන් මාර්ග අවහිර කරමින් විරෝධතාවයන්හි නිරත වන බව වාර්තා වේ.

ගොවිපොළ නීතියට විරෝධය පළ කරමින් ගොවීන් පසුගිය නොවැම්බරයේ සිට දිල්ලියේ මායිම්වල කඳවුරු බැඳගෙන සිටින අතර මෙම නීතිය අහෝසි කරන ලෙස බල කරමින් විවිධ විරෝධතාවල ද නියැළිණි.

ඉන්දීය රජය සහ ගොවි සංගම් අතර අවස්ථා කිහිපයකදීම සාකච්ඡා වට පවත්වා ඇති නමුත් ඒවා සාර්ථක නොවූ බව ද වාර්තා වේ.

ඉන්දීය රජය පෙන්වා දෙනුයේ මෙම ගොවිපොළ නීතිය මගින් ගොවියාගේ ආදායම වැඩි කරන බවයි. නමුත් මෙය අසාධාරණ සූරාකෑමක් බව ගොවීන්ගේ මතයයි.

මෙම නීතිය මගින් පෞද්ගලික ගැනුම් කරුවන්ට අනාගත විකිණීම් සඳහා භාණ්ඩ ගබඩා කිරීමට ඉඩ සැලසීම , ගොවිපොළ නිෂ්පාදන විකිණීම, මිල නියම කිරීම සහ ගබඩා කිරීම පිළිබඳ නීති වෙනස් කිරීම ද සිදු වන බව ඉන්දීය මාධ්‍ය වාර්තා කරයි