කොළඹ වරායේ නැගෙනහිර පර්යන්තය ඉන්දියාවට විකිණීමක් සිදු නොවන බව සහ එම පර්යන්තය සංවර්ධනය කිරීම සඳහා ආයෝජකයෙකුට ආරාධනා කරන බවට අමාත්‍ය රෝහිත අබයගුණවර්ධන මහතා විසින් සිදු කොට ඇති ප්‍රකාශය පිළිබඳව ලංකා ලීඩ් ජාතික සංවිධාන එකමුතුවේ මතය විමසන ලදි. මේ ඔවන්ගේ මතය ඔවුන්ගේම වචනයෙන් –

” නැගෙනහිර පර්යන්තය ඉන්දියාවේ අදානි සමාගමට පැවරීම හෙවත් එහි කළමණාකාරීත්වය එම ආයතනයට පැවරීම සඳහා ඉදිරිපත් කළ අමාත්‍යමණ්ඩල පත්‍රිකාව අනුව ශ්‍රී ලංකාවේ වරාය අධිකාරිය විසින් එම ජැටිය හැදීමට වැය කළ මුදල සහ ඉදිරි වසර 35 කට බිම් කුලිය ගෙවා පර්යන්තයට අවශ්‍ය උපකරණ සහ යන්ත්‍ර සවිකොට කළමණාකරනය කිරීමේ අයිතිය අදානි සමාගමට පැවරේ.

එය මුදල් ලබාගෙන ජැටිය බදු දීමක් හෝ මිස අන් යමක් නොවේ. එහිදී බදු දීම යන වචනයට වඩා දිකිණීම යන වචනය යොදා ගැනීම සුදුසු වන්නේ  එම අමාත්‍ය මණ්ඩල පත්‍රිකාව මගින් කාල සීමාවක් පනවා නැති බැවිනි. අප සතු ගොඩනැගිල්ලක ව්‍යාපාරික කටයුත්තක් කිරීමට අපට මූල්‍ය හැකියාව නැති නම් ණයක් ලබාගෙන අප එය කරනවා. ඒත් වැඩේ බැරිනම් අප ගොඩනැගිල්ල බද්දට හෝ විකිණීම කරනවා. දීර්ඝ කාලයකට බදු දීම විකිණීම හා සමානයි. මෙතන තියෙන්නෙ හැකියාව නැතිකම හෝ බැරිකම නොවේ ඒක ඕනෑකමක්. ඉන්දියාවේ බලපෑම අනුව පර්යන්තය ඉන්දියාවට ලබා දීමේ ඔනෑකමක්. ඒක දේශපාලන තීන්දුවක් මිස ආර්ථික හෝ වානිජ ව්‍යාපාරික තීන්දවක් නොවේ. අදානි සමාගම ඉන්දියාවේ ආණ්ඩුවත් මිලදී ගත් සමාගමක්. ඒ අයට ලංකාවෙ අය මිලදී ගැනීම කියන්නෙ ඉතා සුළු දෙයක්”