ඉකුත් වසරේ පාස්කු ඉරුදින මීගමුව කටුවාපිටිය දේවස්ථානයට මරාගෙන මැරෙන ප්‍රහාරයක් එල්ල කළ හස්තුන් නැමැත්තාගේ බිරිද වන පුලස්තිනි මහේන්ද්‍රන් නොහොත් සාරා ජෙස්මින් නැමැත්තිය සයින්දමර්දුහි නිවසක සිදුවු පිපිරීමෙන් මියගිය බව මෙතෙක් තහවුරු වී නොමැති බව පාස්කු ප්‍රහාරය පිළිබඳ විමර්ශනය කරන ජනාධිපති කොමිසමේදි අනාවරණය වී තිබේ .

කොමිසම හමුවේ සාක්ෂි දෙමින් ජ්‍යෙෂ්ඨ පොලිස් අධිකාරි සාමන්ත විජේසේකර මහතා සඳහන් කළේ සයින්දමර්දු හි මරාගෙන මැරෙන බෝම්බ පුපුරුවාගත් නිවසේ අවසන් මොහොත දක්වා සාරා ජෙස්මින් නැමැත්තිය සිටි බවට විමර්ශන ඔස්සේ අනාවරණය වුවද, පිපිරීමෙන් පසු හමුවු කිසිදු මළසිරුරක් ඇයගේ මවගේ DNA සාම්පල සමග නොගැලපෙන බවය.

ඉකුත් වසරේ අප්‍රේල් 26 වන දින සයින්දමර්දු හී නිවසක් තුළ සිදුවු පිපිරීම සම්බන්ධයෙන් පාස්කු ප්‍රහාරය පිළිබද විමර්ශනය කරන ජනාධිපති කොමිසමේ සිදුකෙරෙන සාක්ෂි විමසීම ට අදාළ ව ඊයේ (20) දිනයේ සාක්ෂි ලබාදෙමින් අම්පාර පොලිස් කොට්ඨාසය භාරව ක්‍රියාකළ ජ්‍යෙෂ්ඨ පොලිස් අධිකාරි සාමන්ත විජේසේකර මහතා මේ බව සඳහන් කළේය.