2022 මැයි 09 දා අරලිගහ මන්දිරයෙන් මුදාහැරුණු ප්‍රචණ්ඩත්වය ගාලුමුවදොර දක්වා ක්‍රියාත්මක වු අතර, ඒ සමගම කොළඹ නගරය හා තදාසන්න ප්‍රදේශවල ප්‍රචණ්ඩත්වය පැතිර ගියේ සුළඟක් මෙනි. අරලියගහ මන්දිරය වෙත පිරිස් ප්‍රවාහනය කරනු ලැබු බස්රථ වල නොම්මර සමාජ මාධ්‍ය හරහා ප්‍රචාරය කෙරුණ අතර විවිධ පුද්ගලයින් ඉලක්ක කොට පහරදීම් වලට පෙලඹවීම් සිදු වු බව පෙනුනි.

රටපුරා මුදාහැරුණු ප්‍රචණ්ඩත්වය, සියළු මානව සීමා – මායිම් අතික්‍රමණය කරමින් වනචාරීත්වය විදහා දැක්වීය. නිවාස හා වෙනත් දේපල ගිනිබත් කරනු ලැබුනි. ගිනිබත් කෙරුණු නිවාස වල තිබුණු සම්පත් කොල්ලකනු ලැබුනි. විවිධ පුද්ගලයෝ ඝාතනය කෙරුණි. ඇතැම් තැනක සිරුරු තලා දමමින් පුද්ගලයෝ මරා දැමුණි. මෙම සිදුවීම් ක්‍රියාවට නැගුණු ආකාරවල යම් සමානත්වයක් පැවැති බවද එම සිදුවීම් වලට මුහුණ දුන් ඇතැම් පිරිස් පවසති. එසේම එම සිදුවීම් යම් සංවිධානාත්මක බවක් පෙන්නුම් කල බවක්ද පෙනී යයි.

මෙම සිදුවීම් මගින් සමාජීය මනසට ඇතිකළ භීතිය හා පීඩනය, රටතුල ඇති කළ කළු පැල්ලම මෙන්ම ජාත්‍යන්තර වශයෙන් රටට ගෙන ආ අපකිරීතියද ඉතා බලවත්ය.

අරලියගහ මන්දිරයෙන් මුදාහැරුණු ප්‍රචණ්ඩත්වයෙන් ඇරඹී දින කිහිපයක් පුරා රටතුල දියත් කෙරුණු වනචාරී ප්‍රචණ්ඩත්වය පරීක්ෂාවට ලක් විය යුතුය. එම ප්‍රචණ්ඩත්වයේ අගමුල, ඒවාට නියෝග දුන්නෝ, වගකිවයුත්තෝ, සැලසුම් කරුවෝ සහ ක්‍රියාත්මක කෙරූවෝ රට ඉදිරියේ හෙලිදරව් කළ යුතුය. ඔවුන් විසින් කරනු ලැබු අපරාධ වලට සුදුසු පරිදි දඩුවම් ලැබිය යුතුය. නැවත මෙවැනි තත්ත්වයන් ඇතිවීම වලක්වා ගත හැක්කේ එලෙස ක්‍රියා කිරීමෙනි.