ජාතික ඖෂධ නියාමන අධිකාරියේ ඖෂධ ලියාපදිංචියට අදාල වන දත්ත හදිසියේ අතුරුදහන් වීම පිටුපස පසුගිය රජයේ සෞඛ්‍යය අමාත්‍යයවරයාට සම්බන්ධ හිතවතුන් කිහිප දෙනකු සිටින බවට බරපතල සැකයක් මතුව ඇති බව අන්තර්ජාල පුවත් අඩවි කිහිපයක වාර්තා කර තිබේ.

පසුගිය රජය සමයේ අදාළ අමාත්‍යයවරයා සම්බන්ධ වූ බවට සැලකෙන ඖෂධ වංචා කිහිපයක් සම්බන්ධයෙන් අපරාධ පරීක්ෂණ දෙපාර්තමේන්තුව විමර්ශන ඇරඹීමත් සමග ඖෂධ නියාමන අධිකාරියේ ඖෂධ ලියාපදිංචියට අදාල දත්ත ගබඩාව මැකීයාම පිටුපස විශාල අබිරහසක් ඇති බව ඖෂධ නියාමන අධිකාරියේ ඉහල නිලධාරියෙක් පවසා ඇති බවද එම පුවත් අඩවි වාර්තා කර සිටී.

2015-2019 වර්ෂවල රජයේ ආයතනවල සිදු වූ වංචා විමර්ශනය පිලිබඳ ජනාධිපති කොමිෂන් සභා වාර්තාවෙන් හෙළි කර ඇත්තේ “ට්‍රට්සුසුමැබ්” නම් පිළිකා රෝගීන්ට ලබා දෙන ඖෂධය වංචනිකව ගෙන්වීම මගන් පමණක් රජයට රු මිලියන 850 ක පමණ පාඩුවක් සිදුව ඇති බවයි.

මේ අතර 2018 වර්ෂයේදී ඖෂධ නියාමන අධිකාරියේ දත්ත ගබඩාව පවත්වාගෙන යෑමට පෞද්ගලික සමාගමකට ටෙන්ඩර් කැඳවා භාර දී තිබූ අතර එකී පෞද්ලිගලික සමාගමේ පරිගණක තාක්ෂණ ශිල්පියකු මෙම දත්ත ගබඩාව මකා දමා ඇති බවට මේ වනවිට කරුණු හෙළිදරව් වී ඇති බවද හෙළිවී තිබෙන බවද එම පුවත් වෙබ් අඩවි වාර්තා කර සිටී.

අපරාධ පරීක්ෂණ දෙපාර්තමේන්තුව මේ සම්බන්ධයෙන් මේ වනවිට පුළුල් විමර්ශනයක් අරඹා ඇති බව පොලිස් ආරංචි මාර්ග පවසයි.